IMAK: Ilaasortat tusaaneqarnissaat pingaaruteqarpoq
Kattuffinnut allanut neqeroorutigineqartut allat saniatigut ilinniartitsisut akissarsiaat 2,55 procentimik immikkut qaffaavigineqassapput. Ukiuni sisamani tulliuttuni akissarsiat qaffariaatissaat tamakkerlutik 7,35 procentiupput.
Tamatuma saniatigut atuartitsinissat piffissaqarfigiumallugit ataatsimiittarnerit ilaannut piffissaq atorneqartartussaq annerpaaffissalerneqarpoq. Taamaalilluni atuartitsinerit ilinniartitsisunit piffissaqarfigineqarnerulerniassammata.
IMAK-imi siulittaasup isumaqatigiissut pillugu ilaasortani ilisimateqqaartinnagit annerusumik oqaaseqarumanngikkallarpoq.
- Nuummi ilinniartitsisut aallarniutigalugit ullumi ilisimatinneqassapput, tamatumalu kingorna IMAK-imi siulersuisut sinerissami illoqarfinnut siammarluta ilaasortanut paasissutissiiartussaagut, Sivso Dorph oqarpoq.
KANUKOKAp siulittaasua Martha Abelsen siulersuisut ataatsimeeqatigeqqaartinnagit annerusumik oqaaseqarusunngikkallarpoq.
Taassumali ilinniartitsisunik atorfinitsitseqqusiunnarluni mattussinerup qaangiunnera oqiliallaatigaa, kommunimmi taamaalillutik ilinniartitsisunik atorfinitsitsisinnaalermata ukiullu atuarfiusup tulliuttup pilersaarusiornera aallartissinnaalermassuk.
Aningaasaqarnermut Naalakkersuisoq Maliina Abelsen atuartut pingaarnerutillugit aamma oqaaseqarpoq.
- Atuartut taamaalillutik piumasaasut naapertorlugit atuartinneqarsinnaalerput. Ilinniartitsisut atuartitsinerunissamut peqataarusunnermikkut inuiaqatigiinnut pisussaaffimminnik ajunngitsumik akisussaassuseqarnerminnillu takutitsipput, Maliina Abelsen arfininngormat oqarpoq.
Ilinniartitsisut sulisitsisuminnut aaqqiagiinngissuteqarnerat tallimanngornerup arfinngornerullu unnuaani qaangiuppoq. Tassami sivisuumik isumaqatigiinniartoqareerneratigut, 2010-mi apriilip aallaqqaataannit 2014-imi marsip 31-annut atuuttussamik isumaqatigiissuteqartoqarmat.
