- Naalakkersuisut siulittaasuata nualluussuarmi ataatsimiititaliarsuarmi innersuussutaat kommunitoqqat iluanni taanna aaqqissuusseqqaarneq isumatusaartutut uanga nammineq siulittaasutut isummerfigissavara, Birthe Møller Therkildsen, IMAK-imi siulittaasoq oqarpoq.Assi: IMAK

IMAK atuarfeqarfiit ammariartuaarnerat pillugu: Isumatusaarneruvoq

Nuup avataani atuarfeqarfiit poorskereerpat ammaqqikkiartuaassasut, Naalakkersuisut nalunaarutigaat. Ilinniartitsisut Kattuffiat IMAK aalajangiinermut isumaqataavoq.

Nuup avataani meeqqat atuarfiini atuartut angerlarsimaffimminni poorskip kingorna atuartarunnassaapput.

Kim Kielsen ullumi tusagassiortunik katersortitsinermini taama nalunaaruteqarpoq.

Ilinniartitsisut Kattuffianni IMAK-imi siulittaasoq aalajangiinermut isumaqataavoq.

- Naalakkersuisut siulittaasuata nualluussuarmi ataatsimiititaliarsuarmi innersuussutaat kommunitoqqat iluanni taanna aaqqissuusseqqaarneq isumatusaartutut uanga nammineq siulittaasutut isummerfigissavara, Birthe Møller Therkildsen, IMAK-imi siulittaasoq oqarpoq.

Poorskip kingorna

Nuup avataani meeqqat atuarfii nunatsinnilu ilinniartoqarfiit tamarmik immikkut ilitsersuusiortoqarneratigut apriilip 14-iat aallarnerfigalugu ammariartortinneqalissasut, Naalakkersuisut ullumi nalunaarutigaat. 

- Atuarfiit pisortaasa eqqarsaatigilaartariaqarpaat amerlasuut katersuutinnginnissaat. Atuartut ilaat ullaap tungaani ilaallu ualikkut atuartinneqarsinnaapput. Taakkununngali qaninnerpaasut pilersaarusiussapput. Taakkununnga annikitsukkuutaartumik pilersaarusiussanngilagut, nakorsaaneq oqarpoq.

Taamaattumik sapinngisamik atuartut inissaqarluarnissaat; ilaatigut atuarfeqarfiup eqqaa tamarmi atorluarneqassasoq, ullup atuarfiusup assigisaasalu tamakkiisumik atorluarnissaa innersuussutaavoq.

AAMMA ATUARUK Tamaat isigalugu: Nuummi killilersuisoqaannassasoq - sineriammili atuarfeqarfiit annikitsukkuutaartumik ammassasut

Nualluut coronavirus siammatsaaliorniarlugu atuarfeqarfiit nuna tamakkerlugu matuneqassasut marsip 18-iani Kim Kielsenip nalunaarutigaa. 

Ungasissumit ilinniartitsinerit iluatsilluartut

Taamammat meeqqat atuarfiini ilinniartitsisut angerlarsimaffimminnit ilinniartitisisariaqarsimapput.

Tamannalu iluatsilluarsimasoq, IMAK-imi siulittaasoq oqarpoq.

- Ilinniartitsisut nersugassaapput, akisussaaffik tamaat tiguaat atuartitsillutillu ungasianinngaanniit.

- Ungasianiit atuartitsinermi aaqqissuussinerit iluatsittut, taamaammat nersualaagassarujussuupput ilinniartitsisut aamma angajoqqaat, Birthe Møller Therkildsen oqarpoq.

Nuummi meeqqat atuarfii matoqqagallartinnissaat naalakkersuinikkut aalajangigaavoq. Ungasissumiit ilinniartitsinerit taamatut ingerlaannassapput, atuartullu soraarummeertussat soraarummeernissaminnut soraarummeernerillu ingerlannissaannut piareersarnissaat sianigineqassapput.

Nunatsinni inuit aqqanillit coronavirusimik tunillanneqarput. Taakku tamarmik Nuummi najugaqarput.

Tunillatsissimasunit qulit maanna peqqisseqqissimapput.

Isummersuutit