Images of Greenland – Pingajussaanik
Anette Molbech aamma Tina Enghoff ukiuni kingullerni marluni Tasiilami, Paamiunilu meeqqanut assilissanik allagartalersukkanik suliaqartitsisimapput. Suliniut Images of Greenland assilissanik allagartalersukkanik meeqqat inuusuttullu inuunerannik ersersitsisuuvoq.
-Tinap meeqqat piginnaaneri atorlugit assilialiortitsisarpoq, uangalu allagartalersuititsisarpunga. Assilissat peqataasunit naammassineqartut allagartalersukkat nangeqattaartuullutik suliaasarput. Tasiilami Paamiunilu taama suliaqartitsinitsinni suliat naammassisat tulluusimaarutigisimaqaagut, maannalu kingumut taama suliaqartitsinissatsinni tamatumuuna Nuummi pisusamut qilanaaqaagut, Anette Molbech oqaluttuarpoq.
Images og Greenlandimi siunertaavoq meeqqat inuusuttullu Sermersuup kommuneani inuunerat assilianngorlugu takutinneqarnissaa. Novemberimilu Nuummi meeqqat inuusuttullu peqataanissaminnut periarfissaqalerput. Kingornalu assilissat allagartalersukkat meeqqat inuusuttullu suliaat saqqummersinneqarumaarput.
-Taama aaqqiissuussamik suliaqartitsineq marloriarluta misilereersimavarput. Maannalu pingajussaanik taama aaqqisuinissatsinni piumassuseqarluarpugut. Assilissatigut illoqarfik ilisaritissavarput, peqataasullu allagartalersuinerminni siunissamut takorluukkatik neriuutitillu oqaluttuariumaarpaat. Qularnanngilaq eqqumiitsuliorneq aqqutigalugu peqataasut pissarsiaqarluarumaartut, inuunermilu ingerlaqqinnissami takorluukkanik peqataanertik pissarsiffigilluarumaaraat, Anette Molbech novemberimi Nuummukartussaq taama naggasiivoq.
