"Imaassinnaavoq aliatsarujussuaqqasut nassaarineqarneq ajortut"
Eqqarsartaatsikkut nappaatinut nakorsap Nicolaj Kleistip, Dronning Ingridip Napparsimmavissuaneersup, maluginiassatut isigaa:
- Erninermi naartunermiluunniit aliatsarujussuarnermik nalaataqartartut, misigissutsikkut nanertisimasunit assigalugit katsorsarneqartarput. Katsorsaariaatsilli assigiikkaluartut naartusunut ernerlaanulluunniit katsorsaariaaseq mianersornartoqartarpoq. Tassani eqqarsaatigalugit naartusut milutsitsisullu iisartakkanik sakkortuallaanik tuninaveersaarneqartariaqarput, tassami meeqqap nukillaangassutigalugulu eqqissiveqanngissutigisinnaammagu. Nakorsaq, eqqarsartaatsikkut nappaatinut nakorsaq Nicolaj Kleist oqarpoq.
Dronning Ingridip Napparsimmavissuani peqqissaasut meeqqerisut marluk ulluni makkunani Danmarkimiipput, erninerup kingorna naartunermiluunniit aliatsarujussuarnermik nalaataqartut sunik ilisarnaateqartarnerat tassani paasisassarsiorfigalugu.
Kisitsisit Nunani tamalaanneersut takutippaat ernisartut 10 procentii aliatsarujussuarnermik annerusumik minnerusumilluunniit nalaataqartartut. Tamannali nunatsinni allarluinnartut isikkoqarpoq.
Assersuutigalugu Nuummi ukiumut ernisartut 1 procentiisa misigissutsimikkut nanertisimasutut misigisarput. Nakorsap, eqqarsartaatsikkut nappaatinut nakorsap Nicolaj Kleistip Kalaallit Nunatsinni erninermi aliatsarujussuartartut arlaqassagaluartut qularutiginngivippaa:
- Soorunami aamma Kalaallit Nunaanni atugaavoq, inuttummi sananeqaatitsinni allaanerunngilagut nunanut killernut sanilliulluta. Kisianni nassuiaatissaqartinngilara sooq taama takussaanngitsiginersoq, imaassinnaavoq nassaarineqarneq ajortut, imaluunniit eqqorneqarsimagaluarlutik malugisarsimanngikkaat. Kisianni naluara sooq, nakorsaq, eqqarsartaatsikkullu nappaatinut nakorsaq, Nicolaj Kleist, oqarpoq.
Apriilip aallaqqaataa aallarnerfigalugu Dronning Ingridip Napparsimmavissuani ernisussat tamarmik misissorneqarnissaminnut periarfissinneqartalissasut Peqqissaasut Iben Motzfeldtip aamma Sabina Andreasenip ilanngullugu oqaatigaat.
