Imaani miluumasut uuliasiornerillu
Isumasioqatigiinnermi Pinngortitaleriffimmi USA-milu ilisimatusartartut akunnerminni misilittakkaminnik tunioraateqatigiissapput. Ilisimatusartartut USA-meersut, National Marine Mammal Laboratory, Alaska Fisheries Science Centerimeersut aamma University of Galveston, Texasimeersut, isumasioqatigiinnermi peqataassapput. Amerikkarmiut aallartitaasa ilaatigut taakani imartaminni miluumasunut tunngatillugu uuliasiornernut gassisiornernullu atatillugu aqutsinermi maleruagassat atortinneqartut nassuiaateqarfigissavaat.
Ilaatigut aamma maani Aatsitassanut Ikummatissanullu Aqutsiveqarfiup uuliasiornernut atatillugu qinnuteqartitseriaasia, ingerlatseriaasia aammalu ingerlatsereernerup kingorna nalunaarsuisussaatitaanermik piumasaqaatit misissoqqissaarneqassapput nalilersuiffigineqarlutillu.
Ilanngulluguttaaq Baffin Bugtimi uuliasiortoqarneranut atatillugu ilisimatusaatigalugu imaani miluumasut misissuiffigineqarnerinit inernerit nalilersorneqassapput. Matumani aamma amerikkarmiut uuliasiorluni qillerinernit imaanilu miluumasunut tunngatillugu misilittagarilersimasaat ilanngullugit eqqartorneqassapput.
Peqatigitillugu ilisimatusartartut nalilersussavaattaaq maani nunatsinni amerikkamilu ilisimatusarnernik ingerlatsiveqarfiit avatangiisit pillugit siunnersuinerni pingaartumik issittup imartaani miluumasunut, soorlu arferit anginerit pineqartillugit, suleqatigiittoqartarsinnaanera.
Pinngortitaleriffimmi imaani miluumasut uuliasiornerillu pillugit isumasioqatigiinneq ingerlanneqassaaq suliffeqarfiup uuliasiornernut tunngatillugu avatangiisit pillugit siunnersuinernik piginnaasaminik qaffassaaniarneranut atatillugu.
