Imaani isumannaallisaaneq ilisimasortaqartitsinikkut annertusarniarneqartoq

Ilisimasortaqartarnissamut siunnersuut issittup imartaani imarsiornermi isumannaallisaaneq pillugu malittarisassanik sukaterinermut ilaavoq:
 
- Umiarsuit 250-inik ilaasullit imaluunniit amerlanerusunik ilaasullit piumaffigineqartalissapput "lodspligtimik", tassa angalaffigisamik ilisimasalimmik ilinniarsimasumik ilaasoqartarnissaanut. Taamaalilluni ajutoornissaq minnerpaaffissaaniitinniarlugu siunissami, Peqqissutsimut avatangiisunullu Naalakkersuisoq, Steen Lynge, oqarpoq.
 
Taamaalilluni siunissami takornariartaatit 250-it sinnerlugit ilaasoqartut ilinniarsimasumik ilisimasortaqarlutik nunatta avannaarsuani kangianiluunniit aatsaat angalaarsinnaanngussapput:
 
- Takornariaqarnikkut ingammik umiarsuit taamatut annertussusillit ajutuussangaluarpata, taavalu taamatut aaqqiisoqarnikuunani, takornariaqarneq ajutoornikkut unittuuvitsinnissaa pinngitsoortinniarlugu. Taamaattumik tassa ajutoorsinnaanerit minnerpaaffissaanik anguniagaqartuarnissaq ilaatigut akisussaaffigaarput, Steen Lynge oqarpoq.
 
Kisianni tassa ilisimasortaqartitsisarnissat Naalagaaffiup pigisaanit, Dan Pilotimit, aallaqqaammut ataqatigiissarneqartassapput:
 
- Kisianni tassa siunissami Nunatsinni aamma ilinniarsimasunik periarfissiisoqassaaq. Taamaalilluni aamma suliffissanik pilersitsisinnaaneq tassuunaatigut aamma aqqutissiuunneqassalluni, Steen Lynge oqarpoq.