Imaani ajornartorsiortut
Sapaatiummat ullup qeqqata missaani umiatsiaq tallimanik ilaasulik Kangerup eqqaani motorerliulerpoq. Taamaammat umiatsiami 16 fodsinik takissuteqartumi ilaasut Aasiaat Radioatigut ikioqqullutik kalerrisaaripput.
- Politiit angallataat Sisak II sumiiffimmut nalunaarutigineqartumut aallartinneqarpoq. Taamaalisoqarnerani Aasiaat Radio-atigut nalunaarutigineqarpoq umiatsiaq taanna umiatsiamit allamit kalinneqalersimasoq. Umiatsiaq Nuummukaanneqarpoq, inuillu taakku tallimat tamarmik ajunngillat, Nuummi Politiit ilisimatitsipput.
Umitsiami ilaasoq ilisimajunnaartoq
Arfininngormat ulloqqeqqata-tungaa umiatsiami allami ilaasut Nuup eqqaani ajornartorsiortut kalerriutigineqarpoq. Umiatsiami pineqartumi inuit tallimat aamma ilaasorineqarput, ilaasoq ataaseq ilisimajunnaarsimavoq, ilaasullu allat aamma inuummarliorlutik.
- Inuk tamatuminnga nalunaarutiginnittoq umiatsiamik sukkasuuliamik ilaaffissarsisimavoq, ilaasorlu ilisimajunnaartoq sukkanerpaamik Nuuliaanneqarsimavoq napparsimaviliaanneqarlunilu, Nuummi Politiit ilisimatitsipput.
Umiatsiami ilaasut gassimik kiassaat atorlugu umiatsiap iluani kaffiliorlutik inuummarlulersimapput. Umiatsiami ilaasut allat aamma napparsimaviliaanneqarsimapput.
- Pisoq eqqarsaatigissagaanni tamarmik ajunngillat. Pisimasoq pillugu paasiniaasoqarpoq, pissutaasorlu suunersoq inaarutaasumik nassuiaatissaqanngikkallarpoq, Nuummi Politiit ilisimatitsipput.