Siorarsiorfiup siunissaa nalorninartoq: Ilumut imminut akilersinnaava?
Nuummi illoqarfittaassap Siorarsiorfiup pilersaarusiorneqarnera 2010-mi saqqummiunneqaqqaarmat takorluukkat qaamasuugaluarput. Siorarsiorfimmimi inissiat 3000-it Ukkusissap kujasissortaani pilersinneqarnissaat siunertarineqarmat.
Illoqarfiullu immikkoortortassaa taanna sullorsuarmik aqquserlugu Nuummut atassuserneqassaaq. Pilersaarutillu naapertorlugit Kangerluarsunnguup tungaanut aqqutissamut alloriarnerusussatut siullertut naatsorsuutigineqaraluarpoq.
Maannakkulli pilersaarutit nalorninarsipput
Nuup ineriartortinneqarnissaanut kommunip pilersaarutaanut Siorarsiorfik suli ilaavoq, akissaqarfigineqarnersorli apeqqutaalerpoq.
- Siorarsiorfiup tungaanut sullorsualiussagutta qanoq akeqassava? imminullu akilersinnaava? suliamut tassunga naatsorsuutit utaqqivagut. Taannaavorlu alloriarnissamut tigussaanerpaaq, kommunalbestyrelsemi sanaartornermut avatangiisinullu ataatsimiititaliami siulittaasoq Pele Broberg KNR-mut oqarpoq.
Illoqarfittaassami nutaamik atuarfiliortoqarnissaa, meeqqeriviliortoqarnissaa aammalu assigiinngitsutigut inuussutissarsiutinik suliffeqarfeqarnissaa soorlu, kiffartuussinikkut sunngiffimmullu tunngasunut pilersaarutaavoq.
Sulisussaaleqisoqarpoq
Illoqarfimmili ineriartortitsinissamut suliffeqarfik Nuuk City Development siorna atorunnaarsinneqareersorlu pilersaarutigineqartut nalorninarsipput, suliassamullu suliarinnittussaarullutik.
- Politikerit aqagu aaliangeerusukkaluarlutik kisianni sulisussaaleqineq ilutigalugu sukkanerusumik sulisoqarsinnaannginnera aamma ataqqisariaqaratsigu tassami massakkumut nalugallarparput qaqagu akineqassanersoq taanna tigussaasumik, Pele Broberg oqarpoq.
Siusinnerusukkut Kommuneqarfik Sermersuumi borgmesteriusimasoq Charlotte Ludvigsen 2020-mi oqarpoq, ukiut pingasut qaangiuppata Siorarsiorfimmut biilertoqarsinnaalissasoq, tassa imaappoq sullorsuassaq ukioq manna naammassereertussaagaluarpoq, suliarli suli ingerlariaqqinngilaq.
Pele Broberg naapertorlugu pilersaarut suli ungasikkallarpoq. Kommunemmi suliaq ingerlateqqissinnaanngikkallarpaa, qanoq akeqarumaarnissaanut suliamik misissuisitsinini naammassitsinnagu.
- Periaqqinnissatsinnut ilumut tassuunaqquutissanerluta allakkuussanerlutaluunniit paasisaqarnissatta tungaanut naammagittartariaqarpugut. Misissuinerillu inerneri paaseqqaartinnagit suli nalugallarparput, Pele Broberg KNR-mut oqarpoq.
2027-mi piariissasoq
Kommuneqarfik Sermersuup 2022-imi aningaasanut missingersuutaani Siorarsiorfimmut sullorsuassaq 2027-imi naammassissangatinneqartutut allaqqavoq.
Kommunip 2023-imi aningaasanut missingersuutaani Siorarsiorfik eqqaaneqaraluartoq aningaasat qanoq amerlatigisut sullorsuassarlu qaqagu naammassissangatinneqarnersoq allaqqanngilaq.
KNR-imiit borgmester Avaaraq Olsen apersorniarlugu oqaaseqartinniaraluaratsigu iluatsinngilarput.
Nuummi Iserit-imi INI A/S-imilu inuit inissarsiortut katillugit 3.053-it utaqqisuniipput.
