Ilumoortussaq saammaasseqatigiinnissarlu pillugit isumalioqatigiissitap sulinera naammassilerpoq

Ilisimannittut tusindtilikkaat, utoqqaat, inuusuttut, métis, aamma inuit isumalioqatigiissitamut oqaluttuarsimapput, tusarniaanerni tamanut ammasuni matoqqasuniluunniit, nunasiaatilinnit atuarfinni najungaqarfiutigisuni ukiuni hundredeni naapertualluanngitsumik pineqarsimanertik pillugu.

Isumalioqatigiissitami eqqortoq saqqummiunniarlugu sulipput, nunap inoqqaavisa meerartaasa atuarfinni najungaqarfiutigisuni naalliutsitaasarsimaneri pillugit, timikkuinnaanngitsoq aammali tarnikkut. Oqaatitsitik atorlugit oqalukkunik pillarneqartarput ilaqquttaminniillu peersinneqarsimallutik.

Pisimasut pillugit saammaasseqatigiinnissaq pineqarpoq, eqqaamasatik canadamioqatinillu saammaassinissaq pillugit.

Sapaatip akunnerani uani isumalioqatigiissitaq arfineq aappassaannik naggataamillu Edmontonimi, Albertamiittumi ataatsimiissapput. Tassani saamaasseqatigiinnissamut periarfissiisoqassaaq; misigisimasat oqaluttuaralugit, toqoreersimasut eqqartorlugit, pisimasorpiaallu suuneri oqaluttuaralugit. Tarnip pissusaanik ilinniarsimasut, anersaakkullu siunnersortit pisariaqartitsisunik ikiuinissaminnut piareersimassapput.

Saammaasseqatigiinneq aamma isumaqarpoq ingerlariaqqinneq, misigisimasanillu atorluaasinnaaneq, pitsaanerusumik siunissaqaqatigiinnissaq anguniarlugu.

Nunap ilaani ataatsimeeqatigiinnissamut ilimagineqarpoq nunap inoqqaavisa saniatigut aamma canadamiut allat nunamit tamarmeersut aggianissaat. Ataatsimeeqatigiinneq ingerlanneqassaaq sisamanngornermiit sapaammut. Naggasiullugu saammaasseqatigiinnerup aqqani Edmontonip aqquserngisigut ingerlaaqatigiinnersuaqassaaq Albertami naalakkersuisut illorsuinut.