Ilumoorsorisaq eqqortoq
Anorit sammiviisa allanngorartarnerat maliit kissartut nuuinut aamma maliit nillertut nuuisa allanngorartarnerannut assersuunneqarsinnaasoq silasiortoq Søren Jakobsen, DR-ip nittartagaani allaaserisaqarpoq.
Anorit sammiviisa allanngorarnerat maliit allanngorarnerattut assersuunneqarpoq, tassalu silaannaap kissartup, nillertup, isugutaap aammalu panertup allanngorarnerattut assersuunneqarluni.
- Malissuit Amerikap kangisissuanit pisut Europap kitaata avannaanut ingerlaartartut, imarpissuarmi silap qanoq inneranik aalajangiisuusarput. Malissuit taakku angissutsimikkut sukkassutsimikkullu allanngorartuarput. Maliit ingerlaarnerisa isorartussusiat Nuumminngaanniit Københavnimut ungasissusaanut assersuunneqarsinnaavoq, Søren Jakobsen oqarpoq.
Tassalu silaannaap kissartup qutsinnersaa nunatta kitaata kujataaniikkaangat silaannaq nillertoq appasinnerusumiittoq Europap kitaata avannarpasinnerusortaaniittarpoq, tamannalu Danmarkimi silap nillerinneranut pissutaasarluni.
Tassalu oqariaaseq nassuiaatissaqartinneqarpoq, Kalaallit Nunaata kitaata kujataani kianneruleraangat Danmarkimi nillertinnerusarpoq, aammalu killormut pisarluni, Søren Jakobsen allaaserisamini taamatut inerniliivoq.
