Ilulissat Uummannallu akornanni umiarsuarmik angallassisoqartalissaaq
Ilulissat Uummannallu akornanni umiarsuakkut ilaasunik aasaanerani aappaagumiit angallassisoqalissaaq. Disko Line taamatut angalatitsinissamik pilersaarusiortuuvoq, tassa aasaru ataasinngornerit arfinillit atorlugit Ilulissaniit Ummannaliaassisassagami, taamatullu amerlatigisunik Uummannamiit Ilulissiaassisassagami. Siullermik taamatut angallassisoqassalluni aasaru juunip 28-anni, angallassinerlu kingulleq pissaaq aggustip aappaanni. Disko Line tusagassiuutinut nalunaarummini taama allappoq.
septembarip 18-at 2009 07:14
Taassuma saniatigut Uummannamiit Saqqamut sisamanngornikkut Targa 37-mik angallassisoqartassaaq. Tassunga ilaasut Disko Linep angallataanut Saqqami nuussinnaassapput, taamaalillutik Ilulissanut ulloq taanna apuussinnaassallutik.
Taamaalilluni Uummannamukarsinnaaneq Uummannamiillu kujammukarsinnaaneq periarfissarissaarnerulissaaq, tamannami innuttaasunit minnerunngitsumillu takornarianik sullissisunit sivitsortumi kissaatigineqartarmat.
Taamatulli angallassineq misiligutaagallassaaq, 2010-milu ukiakkut nalilersorneqassalluni.
