Ilulissat immaqa 2019-imit busseqalissaaq
Avannaata Kommuniani kommunalbestyrelsimut ilaasortaq Demokraatineersoq, Lena Ravn Davidsen, isumaqarpoq Ilulissat illoqarfiani busseqartariaqartoq. Innuttaasummi pisariinnerusumik akikinnerusumillu illoqarfimmi alliartuinnartumi ingerlaartarnissaminnut pisariaqartitsipput.
Taamaattumik taassuma kommuuni Ilulissani bussiutillit ilaannut kiffartuussinissamut isumaqatigiissusiortariaqartoq siunnersuutigaa.
- Innuttaasut, meeqqat, atuartut, utoqqaat, innarluutillit pitsaanerusumik kiffartuunneqarnissaat angorusuppara taxanik angalaneq, illoqarfipput isorartoqimmat, akisoqimmallu oqinnerusumik akikinnerusumillu angalasinnaanissaat angorusullugu siunnersuutigivara piaartumik naammassineqarnissaa kiffartuussinermut isumaqatigiissutip, Lena Ravn Davidsen oqarpoq.
Lena Ravn Davidsenip kommuuni illoqarfimmi bussiutilinnut kiffartuussinissamut isumaqatigiissusiortariaqartoq, kommunalbestyrelsip kingullermik ataatsimiinnerani oqariartuutigaa.
Taassuma kommunalbestyrelsemut oqariartuutini ataatsimiinnermi sapaatip akunnerata siuliani tunniuppaa. Matumanilu siunnersuut 2019-imut missingersuutissatut isumaqatigiinniutissanut akuerineqarpoq.
Innuttaasut qilanaartut
Innuttaasullu arlallit KNR-imit naapitagut tamatumunnga isumaqataapput. Taakkununngalu ilaavoq Jonas Markussen.
- Bussikulaartorsuunngikkaluarlunga aamma ilaannikkut busseriartarama assorsuaq maqaasinarput. Sualummik ungasinnerusumut pisiniarluni ingerlaniarluniluunniit assorsuaq iluaqutaangaluaramik, Jonas Markussen oqarpoq.
Lena Ravn Davidsenip neriuutigivaa kommuuni busseqarnermut 2019-imit aaqqiissuteqarsinnaassasoq.
Avannaata Kommunianit busseqarnermut kiffartuussinissamut periarfissanik misissuisoqarnerata saniatigut Kommune Qeqertalik Aasianni aamma bussinik kommuunip kiffartuussinermut isumaqatigiissusiorsinnaaneranut misissuisitsivoq.
