Ilulissat eqqaanni Torsukattammi Qeqertaarsuup timaani qivittoq nalunaarutigineqarpoq
Angut 35-nik ukiulik aapparisanilu arnaq Torsukattammi Qeqertaarsuup timaanut, marlunngormat unnukkut aavariarput. Timmut pisullutik aallaramik angut siulliulerpoq, aapparisaalu arnaq akunnerup affaata missaanik sivisussuseqartumik uiminiit kingusinnerulaarluni malinnaarusaarpoq.
- Tassanngaannartumik arnaq tunuminiit tiguneqarpoq, nammattagaatigut tiguneqarluni tunumut nusunneqarluni uniarneqalerpoq. Arnaq nilliannginniassammat qarnga assammik assersorneqarpoq, Ilulissani politiit pisortaat Preben Markvardsen oqarpoq. Pisorlu marlunngormat unnukkut qulit qeqqata missaani pivoq.
Arnaq pinaallunilu nilliasarnermigut angummit iperarneqarpoq, arnaq nissumigut talimigullu annersarneqarsimasoq nalunaarutigineqarpoq. Angut arnamik kalinnilluni qaqqap tungaanukarniaraluaq sumiiffissarsineqarani tammarpoq. Nalunaarutigineqartorlu qivittutut isikkulittut oqaatigineqarpoq.
- Angut 175- 180 centimeterisut angissuseqarpoq, tungujortumik qaamasumik HH-mik ilisarnaatilimmik qarsornikumik nungullarnikumillu kavaajaqarpoq, kavaajaatalu qaavatigut timmissat meqqui nivingapput. Amernik kameqarluni, niuatalu talerpiata tungaani ujaqqamik ipissarneqarsimasumik sakkoqarpoq kiisalu niaqua puisip amianik assiaquteqarluni, Preben Markvardsen nalunaarutigineqartup isikkua pillugu taama oqarpoq.
Ilulissani politiit nalunaarutigineqartoq pillugu qanoq iliussanerlutik suli nalornipput.
