Ilulissat eqqaanni nunarujussuaq ikuallaleraluarpoq

Ilulissani qatserisartut marlunngorneq juulip 24-at kalerrinneqarput qaqqap Inngigissup ataani nunaqarfiit Saqqap Qeqertallu akornanni ikuallattoq.

Erngiinnarlu paasinarsivoq nunangaatsiarsuaq ikuallalersimasoq.

- Naluarput ikuallanneq qanoq aallartissimanersoq. Taamaallaat nalunngiinnarparput aasaanerani seqinnerluni kiannerujussuata kinguneranik nuna panertorujussuusoq, Qaasuitsup Kommuniani upalungaarsimanermut pisortaq Amos Pjettursson KNRimut oqarpoq.

Ikuallaffiusoq sineriammiit 5 kilometerisut tiffasitsigisumiippoq. Taamaammat atortut qatserisartullu 16-it helikopterimik S-61-mik ikuallaffiusumukaanneqarput.

- Qujanartumik ikuallaffiusumi kooqarlunilu taseraqaaluppoq taamalu qatserinermi imissaaleqisoqarani. Ajornerusimassagaluarpoq imeqarpianngitsumik ikuallattoqarsimasuuppat, Amos Pjettursson oqarpoq.

Ikuallanneq 2 kilometerit missaliorlugit takissuseqarsimavoq silinniarpaaffialu 1,5 kilometeri missaliorlugu.

Qatserisartut Inngigissup naqqa qimappaat tallimanngorneq juulip 27-at nalunaaquttap akunneri 37-it qatserereerlutik. Qatserinermi imeq 940.000 kubikmeter atorneqarsimasoq naatsorsuutigineqarpoq.

Maannalu qatserisartut innermik atuisunut mianersoqqussuteqarput.

- Sumiiffippassuarni nuna panertorujussuuvoq. Taamaammat qulakkeerluarneqartassaq killutsigut igareernermi innerup qamivissimanissaa aammalu cigaretit nunaannamut igittaannginnissaat taakku aamaat ikuallannermut aallarniutaasinnaammata, Amos Pjettursson oqarpoq.