Ilulissat: Arnaq aallaammik umerneqartoq
Ataasinngornermut unnuaani nalunaaqutaq 01.30 Ilulissani politiit arnamit Mathias Storchip Aqqutaani inissiaqarfiit silataanni angummit aallaasilimmit umerneqarsimasumit nalunaarfigineqarput. Arnap nalunaarutaa naapertorlugu arnaq angutip aallaammik paarisaminit umersimaa, arnallu kingunitsianngua aallaasip makkorpallattarnera arlaleriarluni tusarsimavaa. Arnaq taama pisoqarmat inissiat ilaannut iserluni qimaasimavoq.
Ilulissani politiini kommissæriungallartoq, Palu Petersen, ilisimatitsivoq politiit sisamat nalunaaruteqartoqarnerata kingorna Mathias Storchip Aqqutaanukartinneqarsimasut.
- Angulli aallaasilik nassaarinngilarput. Aamma arnaq takunnissimasullu apersoqqeqqaarniaratsigit annertunerusumik oqaaseqarsinnaanngilagut, Palu Petersen oqarpoq.
Ilulissani Politiit angummik aallaasisaarsimasumik takunnissimasinnaasut imaluunniit isikkuatut nassuiaatigineqartumut ilisarinnissaasut tusarfigerusuppaat. Angut aallaasisaartoq kalaaleq, 170 - 175 centimeterisut angissusilik, tungujortumik kavaajalik, cowboybukser-ilik aamma aappaluttumik imaluunniit orange-amik qalipaalitimmik teqqialimmik nasalik.
Ilulissani Politiit 70 14 22-mut attaveqarfigineqarsinnaapput.