Ilulissani timersortartut pineqaatissinneqartut
Angutit marluk hashimik nukkassaatinillu eqqussinermi aqutsisuusimasutut qaammatini 14-ini pinerluuteqarsimasut inissinneqartarfianniittussanngorlugit pineqaatissinneqarput, pingajuat peqataasimanermigut qaammatini aqqaneq marlunni pinerluuteqarsimasut inissinneqartarfianniittussanngorlugu pineqaatissinneqarluni.
Ilulissani eqqartuussivimmi angutit inuusuttut pingasut 26-inik ukiullit, ikiaroornartumik hashimik 528 gramimik eqqussisimasutut, nukkassaatinillu puujaasanik 65-inik eqqussisimasutut ullumi eqqartuunneqarput.
Angutit marluk (timersortartutut ilisimaneqartut)ikiaroornartumik hashimik nukkassaatinillu puujaasanik assigiinngitsunik 65-inik eqqussinermi aqutsisuusutut unnerluunneqarlutik qaammatini 14-ini pinerluuteqarsimasut inissinneqartarfianniittussanngorlugit pineqaatissinneqarput.
Aqutsisut marluk Danmarkimi ikiaroornartumik pisisussaq aningaasanik nassittarsimavaat. Ikiaroornartorlu nunatsinnut nassiunneqaraangat pingajuusoq nassinneqartarsimavoq. pingajuusup nassiussat suuneri ilisimasarsimavai, aqutsisunullu ingerlatitseqqiisarsimalluni.
Pingajuusoq ikiaroornartumik hashimik nukkassaatinillu puujaasanik eqqussinermi peqataasimasutut qaammatini aqqaneq marlunni pinerluuteqarsimasut inissinneqartarfianniittussanngorlugu pineqaatissinneqarpoq.
Angutit inuusuttut eqqartuunneqarnerminnut atatillugu suliamut aningaasartuutit aamma akilertussanngorpaat.
Danmarkimi ikiaroornartumik hashimik pisisussaq aningaasanik nassinneqartarsimavoq, taannalu aamma nukkassaatinik pisissutissaminik nassinneqarsimalluni. Taanna ikiaroornartumik hashimik nukkassaatinillu pisinermi saniatigut nunatsinnut nassiussisartuusimavoq.
Danmarkimi pisisartoq nunatta eqqartuussivianni pineqaatissinneqareerpoq.
Ikiaroornartumik hashimik nukkassaatinillu eqqussisoqarsimaneranut suliamut atatillugu,
Apple Iphonet marluk, ikiaroornartoq hashi 528 grami, nukkassaatit puujaaat 65-it 11.000 koruuninik nalillit, aningaasallu 513.000 koruunit arsaarinnissutigineqarput.
Pineqaatissinneqartut illersuisuisa aamma unnerluussisut Ilulissani eqqartuussivimmi pineqaatissiissutigineqartut akuerissanerlugit imaluunniit Nunatta eqqartuussivianut suliassanngorteqqissanerlugit ulluni 14-ini eqqarsaatigeqqaarusuppaat.
