Ilulissani sanaluttartut takornariartitsisartullu coronap nalaani: Pikkunarpoq
Tupilaat, kukkilit, ujammillu aarrit tuuaavinik tuttulluunniit nassuinik sanalukkat. Kim Knudsenip Ilulissani Sanaluttarfimmi ilaatigut tamakkua suliarisarpai.
Kim sanalukkaminik nalinginnaasumik januaarimili tuniniaalertaraluarpoq. Takornariammi ukiumi qimusseriarlutik Ilulissaniittaraluarput. Massakkulli:
- Sanalukkagut qamani uninngarusaaginnavipput, ukiuni qulinit amerlanerusuni sanaluttartoq Kim Knudsen oqarpoq.
Ilulissani sanaluttartut nalinginnaasumik qulit missaaniittaraluarput, massakkulli marluinnaapput.
- Corona takkummat ajornartorsiutigilaavipparput tamaani, Kim Knudsen oqarpoq.
Massakkut isertitaqanngitsoq
Taanna nammineq oqarnini naapertorlugu qaammammut 10-12.000-inik isertitaqartaraluarpoq. Massakkulli aningaasarsiunngilaq.
- Sanaluttartuulluni tunitsivissaaruteriataarluni erloqinartorujussuuvoq, ingammik akiligassat tungaatigut nerisassallu tungaatigut. Inuuniarneq pikkunarnersanngorpoq.
AAMMA ATUARUK Ilulissani takornarialerisut peqatigiiffiat: Ajunaarnersuaqarpoq
Naalakkersuisut coronap ajornartorsiortitsinerani inuussutissarsiutinut ikiorsiissutaagallartunik aalajangersaanikuupput.
Taakkuli Kimmimut iluaqutaanngillat.
- Coronaqalermalli qinnuteqaqattaarnikuugaluaratta kisianni itikkaavugut maani, iluatitsissiffiunngitsoorpoq tamatsinnut sanaluttartunut.
Nuliani qaammammusiaqarmat ikiorserneqarsinnaanngitsoq pisortanit nassuiaanneqarsimalluni oqarpoq.
Ilulissat Boat Tours aamma akunnattooqqavoq
Sanaluttarfiup eqqannguaniittoq takornarialeriffik Ilulissat Boat Tours iserfigaarput. Manna coronavirus peqqutigalugu akunnattoorfimmiippoq.
- Maannamut siunissaq ernumagaarput, Ilulissat Boat Toursimi piginnittoq Sara Lennert taama oqarpoq. Taassuma uinilu Ilulissat Boat Tours ingerlappaat.
Coronavirusilu peqqutigalugu suliffeqarfik matoqqatikkallartariaqarsimavaat. Tassami saaffiginnittut maannamut tallimaannaasimapput.
- Poorskep nalaani ullut tamaasa ullormut arlaleriarluta angallassassaqarnikuugaluarpugut, qimussiussassat, pisuttuaassassat, Sara Lennert oqarpoq.
Tassalu inuusutissarsiutiminnit isertitaat upernaaq manna killeqarsimaqaat.
Pisortalli ikiorsiissutaat iluaqutigisimavaat.
- Iluaqutigisorujussuuarput taanna kriselån. Angallatitta misissortinneranut iluaqutigisorujussuuarput.
Angallassinnginnertik millionit koruunit missaannik annaasaqaatigisimallugit Sara Lennert oqarpoq. Taamaattumik sulinngiffimmi nunatsinni angalanissaq neriuutigaa.
- Neriuppugut arlaatigut nunaqavissut kalaallit ukioq manna nunatsinni angalanissamik aalajangissasut - atorsinnaasagaatigullu.
