Ilulissani qimussimik sukkaniuttoqarnissaa pissanngatigineqartoq
![](/sites/default/files/styles/image_934x467/public/2024-03/VO%20Avannaata%20Qimussersui%20ankomst%20ANP%20GAO%20Still.jpg?h=4233ef75&itok=03njqReI)
Avannaata Qimussersuini sapaatip akunnerata naanerani qimussimik sukkaniuttussarpassuit ataasinngornermi tikipput.
Qimussimilli sukkaniuttussanut 36-nut suna tamarmi eqaatsumik ingerlanngilaq. Qeqertarsuup Tunuani siku pissutigalugu Saqqamit Qeqertamiillu peqataasussat ippassaq unnukkut tikinngillat.
- Periarfissaaleriarpat Ilulissanut assartuinissamut ulloq unnuarlu piareersimasoqarpoq, KNR-ip ilanngutassiortua, Andreas Poulsen ippassaq oqarpoq.
Aaqqissuussinerpassuit
Taamaammat Saqqamit peqataasussat ippassaq aallarfissamik makitsisoqarneranut internetti atorlugu peqataapput.
- Aaqqissuussineq aallartissaaq arfineq pingasunut tassani inersimasut Avannaata Qimussersuinut sukkaniuteqataasussat aallarfissaminnik makitsinissaat pissaaq, Andreas Poulsen oqarpoq.
Makitsisoqareermat qimussimik sukkaniukkiartortut ingerlaarfissamik saqqummiiffigineqarput, sapaatillu akunnerata ingerlanerani assigiinngitsunik aaqqissuussineqarlunilu kulturikkut sammisassaqassasoq, KNR-ip aallartitaa, Ilulissani kulturikkut illorsuarmit toqqaannartumik paasissutissiivoq.
Qimussimik sukkaniunneq sisamanngorpat aallartittariissaaq, tassa inersimasut sukkaniutilinnginneranni meeqqat sukkaniunnerat ileqquusumik ingerlanneqassaaq.