Ilulissani politiit inissiisarfimmiit qimaasoq suli ujaaraat
42-nik ukiulik Jens Kruse Ilulissani suli ujaaraat.
Taanna inissiisarfimmiit sapaatit akunnerata siuliani qimaavoq.
Inuit angummut qimaasumut attaveqarsimasut politiinut saaffiginninnissaat, Ilulissani politiit kaammattuutigaat. Toqqoqqaneranilu ikiuuttunut kinguneqartitsisinnaasoq erseqqissaatigalugu.
Kalaallit Nunaanni politiit pigaartuisa pisortaat, Preben Kleist KNR-imut taama oqarpoq.
- Innuttaasut ilisimatissavagut, arlaanni toqqoqqanerani ikiuuttut akiligassinneqarsinnaasut imaluunniit inissiisarfimmut inissinneqarsinnaammata, Preben Kleist oqarpoq.
AAMMA ATUARUK Politiit inissiisarfimmiit qimaasoq ujaaraat
Politiit angut illoqarfimmi angalaarlutik ujaaraat, najugaqarfinnullu kasuttoqattaarlutik apersuutigalugu.
Jens Kruse 170-it 175 centimeterillu akornanni angissuseqarpoq, nalinginnaasumik timeqarpoq. Qapeqqalluni.
Taanna takusimagukku – imaluunniit sumiinnera ilisimagukku – taava politiinut oqarasuaammut 70 14 48-mut attaveqarnissat politiit kaammattuutigaat.
Politiit oqarnerat naapertorlugu angut avatangiisiminut ulorianarsinnaavoq. Taamaammat takugukku attaveqarfiginiarsarinagu politiinut sianissaatit.
