Ilulissani multihaliliortoqarnialerpoq

Ivigaaraasanik arsaattarfimmi arsaanneq, assammik arsarneq, timersuutillu allat kiisalu tusarnaartitsinerit illorsuarmi ataatsimi periarfissaalissapput. Timersortarfimmik multihalimik Ilulissani sanasoqarnissaa, Qaasuitsup Kommuniata maanna eqqarsaatersuutigaa.
Allattoq Mads Lynge
januaarip 08-at 2010 17:00

Timersortarfiliornissaq pillugu pilersaarusiornissamut Qaasuitsup Kommuniani kommunalbestyrelsi 1 millioni koruuninik immikkoortitsivoq.

Timersortarfik 4600 kvadratmeterit sinnerlugit angissuseqassaaq inunnullu 1300-nut inissaqarsinnaassalluni.

Timersortarfissap ilusissaa titartaganngortinneqareerpoq:

- Ivigaaraasanik arsaattarfimmik qulisamik sanasoqarnissaa takorloorneqarpoq, timersuutilli allat aamma periarfissinneqarnissaat siunertaavoq, Henrik Rafn, Qaasuitsup Kommunianeersoq oqarpoq.

Timersuutit assigiinngitsut apeqqutaatillugit natia allanngortinneqartarsinnaassaaq.

Ilulissani timersortarfik nutaamik timersortarfiliornikkut oqilisaaviginiarneqarpoq, ulluunerani timersortarfimmiittoqarsinnaanissaa siunniuneqarluni.

Utoqqaat suliffeqarfiillu assigiinngitsut timersortarfimmik atuisinnaalissasut, Henrik Rafn oqarpoq.

Missingersuutit naapertorlugit timersortarfittaassaq 53,5 millionit koruuninik akeqassaaq. Aningaasat taakku kommunip nammineq pissarsiarisinnaanngilai, aningaasaateqarfitsigut ilaatigut aaniarneqarlutik.

Multihalip Qoororsuup Aqqutaa Seersuillu Aqqutaata akornanni inissinneqarnissaa pilersaarutaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq