Mittarfissuup Ilulissani 2023-mi piareersimanissaa pilersaarutaagaluarpoq. Suliaqarnerli kinguaattoortoq, Attaveqatigiinnermut naalakkersuisoq, Karl Frederik Danielsen (S) paasissutissiivoq.Assi: Anne Meisner Synnestvedt/KNR

Ilulissani mittarfittaassaq ukioq ataaseq tikillugu kinguaattuussasoq

Silap ajornera coronallu ilungersunartorsiortitsinera. Tamakku Nuummi mittarfissuassap sanaartorneranut kinguartoortitseqataapput. Taamaammallu Ilulissani mittarfiliorneq ukioq ataaseq tikillugu kinguaattuussaaq.

Timmisartorsuit Ilulissanit qangattarlutillu missinnaanngornissaannut piffissaq naatsorsuutigisamit sivisunerussaaq. Mittarfissuassarmi sanaartorneqangajalersoq qaamamtit aqqaneq-marluk tikillugit kinguaattuussaaq.

Mittarfiliortiterneq

* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.

* Qaqortumi nunap immikkoortuani meterinik 1500-nik takissusilimmik mittarfiliortoqassaaq.

* Mittarfissat taakku pingasuusut 3,6 milliardit koruunit missaannik akeqassangatinneqarput.

Attaveqatigiinnermut naalakkersuisoq, Siumumit, Karl Frederik Danielsen paragraf 37-mut apeqqummut akissuteqarluni paasissutissiivoq.

Nunatsinni illoqarfinni takornariaqarfiunerpaami mittarfissuassaq aatsaat 2024-mi atorneqarsinnaalissasoq maanna naatsorsuutaavoq.

Nuuk ukkatarineqartoq

Nuummi mittarfissuassap suliarinera aamma kinguaattoorpoq. Taassumali piffissaq eqqorlugu naammassinissaa pillugu taanna ukkatarineqassaaq.

- Nuummi kinguaattoorneq iluarsiumallugu, pilersaarutigineqaqqaartuminngarnit sivisunerusumik Nuummi annerusumik Munck Gruppen suliaqarniarpoq, Karl Frederik Danielsen allappoq.

- Taamaalillunilu Nuummi sulisut atortullu amerlanerpaartaat nuutsinneqarnissaat 2022-p tungaanut kinguartinniarneqarluni, akissuteqarluni ilanngullugu allappoq.

AAMMA ATUARUK Coronavirusip mittarfinnik sanaartorneq unikaallatsikkaa

Suleqatigiissitsisunit Tillie Martinussen naalakkersuisumut apeqquteqartuuvoq, Kalaallit Airportsilu akissuteqarnissamut paasissutissanik ikiuuppoq.

Paragraf 37-mut apeqqut suua?

* Inatsisartunut ilaasortat naalakkersuisunut apeqquteqarnissamut periarfissaqarput. 

* Apeqqutit qaqugukkulluunniit apeqqutigineqarsinnaallutillu sammisanut tamanut tunngasinnaapput.

Matumani Nuummi sanaartornerup aallartisarnerani kinguaattoortoqareersoq allassimavoq, ukioq ulluni qassiiusuni naatsorsuutigisamit silarlunneruvoq. Tamatuma saniatigut coronap ilungersunartorsiortitsienrata sanaartorniarneq aamma killilersimaarpaa.

Tamakku tamarmik illoqarfiit pingaarnersaanni suliaqarnermut qaammatinik marlunnit pignasunut kinguaattooqqagallarpoq. Tamanna Ilulissani sanaartornissamut sunniuteqarput.

AAMMA ATUARUK Nuummi Ilulissanilu qaartiteriuarsinnassasut

Mittarfissuassat taakku marluk 2023-p naanerani naammassereernissaat siunertarineqaraluarpoq.

Qaqortumi mittarfissaq 2023-mi naammassineqartussatut aamma pilersaarutaavoq, tassanilu kikkut sanaartortuussanersut pillugu isumaqatigiinniartoqaleruttorpoq.

Mittarfiit sanaartornissaannut katillugu 3,6 millionit koruuninik immikkoortitsisoqarnikuuvoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat