Ilulissani Kangia eqqissisimatitaalissava?
Nunatsinni sumiiffiit aqqanillit Ramsareqarfittut toqqagaapput. Taakkualu paasiniaaffiginiarlugit sumiiffiit marluk Qeqertarsuup tunuanut alakkarneqaqqammerput. Uteriarnerminni Ilulissat aqqusaaramikku Kangia tiguartiffigeqaat, massakkullu Ilulissat Kangia Ramsareqarfinngortissallugu soqutigisarilerpaat.
Inge Thaulow Namminersornerullutik Oqartussat sinnerlugit angalaqataasoq oqaluttuarpoq, Ramsarikkut sumiiffinni allanik nunatsinneersunik nakkutigisaqaqqilernissartik soqutigilluinnaraat. Ingammik Ilulissani Kangia soqutigeqaat.
Imaannerluni qalerallit Iluliarmiunut inuuniutaalluartut eqqissitinniarsarigaat?
- Naamik, Ramsareqarfinngoraanni imaanngilaq tamakkiisumik eqqissisimatitsinerusoq. Qaleraleqartuaannarnissaali qulakkeerniarneqarsinnaavoq, ungasinnerusoq aamma eqqarsaatigalugu aalisartut inuuniutigijuaannarsinnaaniassammatigik, Inge Thaulow oqarpoq.
Ramsareqarfik isumaqarpoq aalisagaqarfiit aamma ilanngunniarneqarsinnaalluartut, piujuartitsinissaq siunertaralugu. Aalisartut aalisakkanik inuutissarsiuteqarsinnaajuarnissaat qulakkeerniarlugu ingammik massakkut uuliasiornissaq Alcoalu periarfissatut eqqartorneqaleruttorneranni.
Innuttaasut pisassaqartuarnissaat qulakkeerniarlugu uumasoqatigiit uumajuarsinnaanissaat qulakkeerniarneqartariaqarpoq, Ramsarip allatseqarfia oqariartuuteqarpoq. Kisiannili tassa Namminersornerullutik Oqartussat inaarutaasumik aaliangiisussaaput suut aalisakkat aalisagaqarfiilluunniit Ramsar pillugu isumaqatigiissummut ilanngunneqassanersut.
