Ilulissani innuttaasut nutaat 300-t covid-19-imut akiuussutissamik kapitissasut
Ilulissani covid-19-imut akiuussutissamik ullumi aqagulu kapuisoqarnerani innuttaasut suli akiuussutissamik kapitinneqanngitsut 300-t kapitissapput, allallu aappassaanik kapitissallutik. Avannaata Kommunia nittartakkamini taama paasissutissiivoq.
Utoqqaat illuanni najugaqartut akiuussutissamik kapineqarnissaat ullumimut pilersaarutaavoq. Tassani najugaqartut aappassaanik kapitissapput.
Kapitinnerup aappassaa covid-19-imut illersuissasoq
Akiuussutissaq Pfizer/BioNTechimeersoq covid-19-imik tunillatsinnissamut illersuilluarnerussappat marloriarluni kapitittoqassaaq.
Ilulissani akiuussutissamik kapuineq januaarip aallartinnerani aallartimmat innuttaasut utoqqaanerpaat sangiinnerusullu pigiuakkamik nappaateqartut kiisalu peqqinnissaqarfimmi paaqqutarinniffinnilu sulisut siulliullutik neqeroorfigineqarput.
AAMMA ATUARUK Akiuussutissat nassiunneqartut pingajui tikittut
Innuttaasut suli kapitinneqanngitsut 300-t Ilulissani aqagu kapineqassapput. Taakku tassaapput innuttaasut 65-ileereersimasut, akiuussutissamillu kapuineq kulturikkut illorsuarmi Sermermiuni pissaaq.