Dronning Ingriup Napparsimmavissuani Nuummi sulisut ilaat januaarip ulluisa sisamanni siulliullutik kapitipput.Assi: KNR / Malik Brøns

Akiuussutissat nassiunneqartut pingajui tikittut

Akiuussutissat Ilulissani Nuummilu nutaanik aappassaanillu kapuisoqassaaq – taamaalilluni siullermik kapitinnikut ilaat naammassillugit kapineqassallutik.

Nunarput akiuussutissiorfimmit Pfizer/BioNTechimit akiuussutissanik pissarseqqippoq.

Naalakkersuisut paasissutissiiput.

Akiussutissat nassiunneqartut pingajussaat nunatsinnut tikipput – taakku kapuutit akuutissaannik 975-inik imaqarput.

Nunatsinni akiuussutissamik kapuineq

 

  • Akiuussutissat siulliit nassiunneqartut kapuutit imassaannik 1305-inik imaqarpoq. Taanna ukiortaap kingunitsianngua tikippoq. 

 

  • Kapuutip imassai 975-it nassiussap aappaaniipput. Taanna sapaatip akunnera 2-mi tikiunneqarpoq. Taanna Qaqortumi, Aasianni Sisimiunilu innuttaasunut peqqinnissaqarfimmilu kiffartuussisartunut tunniunneqarpoq.
     
  • Nassiussat pingajuat 975-inik akussartaqarpoq.
     
  • Akiuussutissaq 70-init 80-inut nillissisuseqartumiitsinneqartussaavoq. Taamaammat assartorniarnera ajornakusoorpoq. 
     
  • Akiuussutissaq akuerineqarlunilu nunatsinnut nassiunneqartussaq tulleq amerikamiut nakorsaasiorfianit Modernamit akiuussutissiaavoq. 

Kapuutit akuutissaasa ilaat nunatta kujataanut nassiunneqareerput. Qaqortumimi peqqinnissaqarfimmi sulisut akiuussutissamik sapaatip akunnerani matumani kapineqarlutik aallartinneqarnissaat pilersaarutaavoq. Qaqortumi peqqinnissaqarfimmi sulisut ilarpassui ippassaq kapitipput.

AAMMA ATUARUK Savalimmiormiut coronamut akiuussutissat namminneq akilerusukkaat

Ilulissani Nuummilu sapaatip akunnerata tulliani kapuisoqaqqissaaq. Kapuutit akussaat nassiunneqartut pingajuat illoqarfimmi marlunni nutaanik aappassaaneertumillu kapuinermut atorneqartussaapput – taamaalilluni kapitereersimasut ilaat naammassillugit kapineqassallutik.

Taakku tassaassapput inuit 74-init 65-inut ukiullit, tassa utoqqaanerpaat kapiteqqaarnissaat.

- Akiuussutissamik marloriarluni kapitissimagaanni sunniuteqarnissaa pitsaanerpaasarpoq. Akiuussutissap aappassaa siullermik kapitinnermit siusinnerpaamik sapaatit akunneri pingasut qaangiunneranni pissarsiarineqartussaavoq. Kisianni aamma aappassaanik kapitinnginnermi ullut 42-t ingerlaqqaarsinnaalluarput, nakorsaaneq Henrik L. Hansen KNR-imut oqarpoq.

Sisimiuni Aasiannilu aappassaanik kapisisoqassasoq

Sisimiuni Aasiannilu innuttaasut kapitinnissamut akuersissuteqarsimasut siullermeertumillu kapitereersimasut pilersaarut malillugu aappassaanik kapitinnissamut sapaatit akunneri tallimat missaat qaangiunneranni aggersaqqinneqassapput.

- Pilersaarusiornerput malillugu kapitittut tamarmik kapitinnerminnit ullut 42-t qaangiutsinnagit aappassaaneertumik kapitissapput, nakorsaaneq oqarpoq.

AAMMA ATUARUK Landslæge forventer færre vacciner: 100.000 færre doser leveres til Danmark

Tamatuma saniatigut Ilulissani Sisimiunilu peqqinnissaqarfimmi sulisut tamarmik akiuussutissamik neqeroorfineqarput.

Nuummi peqqinnissaqarfimmi sulisut amerlanerungaatsiarput tamarmillu tunillatsissinnaanissamut aarlerinartumiinngitsut, Naalakkersuisut oqarput.

Taamaammat sulisut ilaat akiuussutissamik suli neqeroorfigineqanngillat.

- Aappassaanik akiuussutissarsinissamut atatillugu attavigineqarsimanngitsut iliuuseqassanngillat. Qaqugukkut akiuussutissiisoqarnissaa pillugu inunnut ataasiakkaanut tusagassiuutitigullu nalunaaruteqarnissaq qulakkiissavarput. Akiuussutissamik kapineqarsimasut pissarsiarinissaat qulakkiissavarput, Henrik L. Hansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat