Politiit ullormut nalunaarutaat: Ilulissani illuaqqamik ikuallattoqartoq
Kalaallit Nunaanni Politiit innuttaasunit arlalinnit Ilulissani sissap eqqaani innermik takusaqarsinnaasunit ullaaq arfineq-marlunut saaffigineqarput.
Ilulissani peqatigiiffiup Qajaq Ilulissap illuaraataa ikuallattoq paasinarsivoq.
Politiit qatserisartullu sumiiffimmut ornigupput, inunnillu aarlerinartorsiortoqanngitsut paasineqarluni, Kalaallit Nunaanni Politiit pigaartuisa pisortaat, Jeppe Andsager oqarpoq.
- Ikuallattoqarneranut pissutaasoq suli ilisimanngilarput, politiilli sumiiffik qimaqqippaat, qatserisartulli suli sumiiffimmiillutik.
Taamaammat ikuallanneq aallartinneqarsimanersoq ilisimaneqanngimmat politiinut suliassaqalissanersoq suli ilisimaneqanngilaq, pigaartut pisortaat oqarpoq.
- Ikuallannerup aallaavii arlaliugaangata imaluunniit imerpalasumik ikuallajasumik atuisoqarsimagaangat pinerluttoqarsimaneranut takussutissaqartarpoq, tamannali maanna suli oqaatigisinnaanngilarput, Jeppe Andsager oqarpoq.
