Ilulissani ilinniarnertuunngorniarfimmik qanittumi pilersitsisoqassanngikkallartoq
Ilulissani ilinniarnertuunngorniarfimmik, timersornermullu tunngasumik ilinniartitaanermik pilersitsisoqarsinnaanera pillugu taamanikkut Naalakkersuisut misissueqqaarnissamut pisussaaffilerneqarput.
Misissuinerulli unitsinneqarallarnissaanut pissutissaqartoq, Ilinniartitaanermut Naalakkersuisup Nivi Olsenip, Anthon Frederiksenip §37 naapertorlugu apeqquteqaataanut akissuteqaataani atuarneqarsinnaavoq.
Inatsisartunummi qinersisoqarnissaanut taamanikkut 2013-imi januaarip ulluisa 31-anni nalunaarutiginnittoqarnera pissutaalluni misissuineq unitsinneqarallartoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsenip akissummini allaaseraa.
Aalajangersarneqartunut pituttugaanngitsut
Naalakkersuisulli misissueqqissaartoqarnissaanik Inatsisartunit taamanikkut pisussaaffilerneqaraluartut, nutaamik qinersisoqarnissaanik nalunaaruteqarnermi pissutsit allanngortartut, Nivi Olsenip oqaatigaa:
- Aalajangiiffigisassatut siunnersuut akuersissutigineqartoq Inatsisartuni piffissami pineqartumi atuuttuni politikkikkut amerlanerussuteqartut isumaannik tunngaveqartarpoq. Isummallu taamani atuuttut Inatsisartunut qinersinerup kingorna Inatsisartuni nutaani amerlanerussuteqartunilu tamatigut isumaqatigineqartanngillat. Tamannalu tunuliaqutaralugu ukiuni amerlasuuni Namminersorlutik Oqartussani ileqquuvoq Naalakkersuisut nutaamik ivertittut siusinnerusukkut Inatsisartuni aalajangersarneqartunut pitussimasannginnerat, Ilinniartitaarnermut Kultureqarnermullu Naalakkersuisoq Nivi Olsen Anthon Frederiksenimut akissuteqarnermini ilaatigut allaaserisaqarpoq.
