Ilulissani ikuallannermit eqqugaasut Røde Korsip ikiorniarpai

Pisiffik/Jysk aamma Kalaallit Røde Korsiat suleqatigiillutik siniffinnik nutaanik oqorutinillu Ilulissani Atersuarni ukiaq ikuallannermi eqqugaasunut tunissuteqarput. Kalaallit Røde Korsiat 20.000 koruuninik tunissuteqarpoq Jyskilu pisinermi akikillisaarujussuarmat ikuallannermit eqqugaasut 15-it nutaanik siniffissaqalerput. Taassuma saniatigut qipinnik, akitsinik oqorutillu puuinik Jysk tunissuteqarpoq.
Allattoq Peter Troelsen, Noah Mølgaard
novembarip 21-at 2012 13:46

Ilulissani ukiaq ikuallannerup kinguninnguaq Røde Korsip Nuummi immikkoortoqarfiata atornikuerniarfia atisanik nassiussivoq. Tamatuma kingorna aamma Ilulissani immikkoortoqarfik qinnuteqarpoq eqqugaasut 15-it ikiorneqarnissaannik taakku ikuallannermi pigisaminnik annaasaqarmata.

- Kalaallit Røde Korsiani nunatsinni atugassanik aningaasaateqarfeqarpugut pisariaqartitsisunut atugassanik. Nunani allani ajunaarnersuarni eqqugaasut ikiortarpagut taamaattoq qularutigisimanngilara Ilulissani eqqugaasut aamma ikiorneqartariaqartut. Ilulissani Jysk attavigaara tassanilu ikiuunnissamut piumassuseqarluarput. Maanna tunniussinerput suleqatigiilluarnerup kinguneraa, Kirsten Mortensen Kalaallit Røde Korsianniit nalunaarpoq.

Ikuallannermi eqqugaasut inuit inuuniarnermikkut oqimaattorsioreerput taassumalu qaavatigut pigisat tamakkerlugit annaanerat eqqugaasunut imaannaanngilaq. Taamaammat ikiuiniarnermi siniffinnik tunnissuteqarsinnaaneq Kalaallit Røde Korsiata tulluusimaarutigaa.

- Ikuallannermi eqqugaasut 15-it avataaniit ikiorneqarnissartik pisariaqartivissorsimavaat. Jysk suleqatigalugu eqqugaasut oqilisaannissaat iluatsipparput. Immaqa tunissutit iluaqutigalugit siunissaat qaamanerulerpoq. Maannami unnuami pitsaasunik siniffissaqalernerat Kalaallit Røde Korsiannit nuannaarutigaarput, Kirsten Mortensen KNR.gl-mut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq