Ilulissani GUX-qalersinnaanera Qaqortumilu timersornermut tunngasumik ilasisoqarnissaa Inatsisartut oqaluuserissavaat
Inatsisartuni ilaasortat Jens NapãtôK´ Naleqqamiit aamma Karen Marie Kyed Frederiksen Demokraatineersoq Qaqortumi GUXip inerisarnissaanik nutaavimmillu Ilulissani sanasoqarnissaanik siunnersuuteqarput.
Inuusuttorpassuit ukiut tamaasa meeqqat atuarfiata naammassinerani Ilulissaniit Qaqortumiillu aallartarput ilinniariartorlutik.
Ullumikkut GUX Aasianni, Sisimiuni, Nuummi Qaqortumilu ilinniarfigineqarsinnaavoq. Naak Qaqortumi periarfissaq pioreeraluartoq Karen Marie Kyed Frederiksen suli taqqavani periarfissanik annertusaarusuppoq.
Taanna siunnersuuteqarpoq GUX-mi timersornermik sammivilik maanna Nuummi taamaallaat periarfissaasoq Qaqortumi aamma periarfissaalissasoq.
- Timersornermut sammivilik kujataani inuusuttut tigummiinnarnissaanut sakkussaasinnaavoq annertooq. Ullumikkut ilaatigut imaammat, inuusuttut kujanaaniit soorlu assersuutigalugu Nuummut nussortarnerat. Timersornermut sammivilimmik immikkut ittumik Qaqortumi neqerooruteqarnikkut, inuusuttut periarfississavagut pilerinartumik toqqagassaqarnissaannut, inuusuttut kujataaneersut angerlarsimaffimmik attaveqaatimillu qanittuaniiginnarnissaannut, Karen Marie Kyed Frederiksen siunnersuummini tunngavilersuivoq.
Taanna aamma isumaqarpoq GUX timersornermut sammivilik Qaqortumut pitsaasumik kinguneqarsinnaasoq.
- Timersorfigineqartartut avatangiisinut pitsaasumik tuniluuttarput, timersornermillu sammivilimmimk aallartitsineq peqatigiiffinnut, peqqissutsimut suliniuteqarnernut sunngiffimmilu neqeroorutinut suleqatigiinnernut alliartuutaasinnaallutik, Karen Marie Kyed Frederiksen oqarpoq.
Avannaa isumaqatigiinngissutaavoq
Taassuma siunnersuutaata Inatsisartuni oqaluuserineqarnera pissaaq Jens NapãtôK´p Ilulissani GUX-qalernissaanik siunnersuutaata oqaluuserineqarnera peqatigalugu.
Ilulissani GUX-qalernissaanik aatsaat Jens NapãtôK´ siunnertuuteqalinngilaq. Tamanna 2023-mi aamma saqqummiuppaa. Tassanili nalunaarusiortoqarmat tamatuma kinguneri pitsaanngitsortaqartussaasut allassimavoq aammalu nutaavimmik atuarfiliorneq 800 millioner koruunit angullugit akeqarsinnaasoq.
Nalunaarummi aamma allaaserineqarpoq Ilulissani GUX-itaassappat Avannaani Ilinniarnertuunngorniarfimmut tamanna kinguneqarnerlussinnaasoq.
Kommune Qeqertalimmi borgmesteri Simigaq Heilmann aamma akerliuvoq siunnersuutip kingunerluutigisinnaasai aarleqqutigalugit.
Tamakkuli aporfiginagit Jens NapãtôK´ siunnersuummik saqqummiusseqippoq.
- Aallartisarnissamut aningaasartuutit qaffasipput, kisianni siunnersuut ungasissumut isigaluni ineriartortitsinissamut tunngavoq aamma ilinniarfiup iluani qaffassaanerulluni, taamaaliluni aningaasaqarnikkut ingerlatsinermilu aningaasartuutit iluaqutissartaat eqqarsaatigalugit angallannikkut, ilinniartut inissiaannik inissaqarnikkut ilinniartitsisunillu atorfinitsisarnissat eqqarsaatigineqareerlutik, Jens NapãtôK´ siunnersuummini tunngavilersuivoq.
