Ilulissani GU-qalernissaa isumalluarfigaat
- Pilersitsisoqarnissaanut suliniarnertik ingerlatiinnassavaat, ilinniartitaanermullu iliuusissap oqalliseqataaffigineratigut Ilinniarnertuunngorniarfiup pisariaqartinneqarnera erseqqissartuassavaat, Ilinniartitaanermut Naalakkersuisoq Palle Christiansen innuttaasunut ataatsimiititsinermi tapersersuilluni taama oqarpoq.
Suliniaqatigiit isumalluarnerulertut, Lena Ravn Davidsen oqarpoq.
- Isumalluarneq suli annerulerpoq, uatsinni suliniaqatigiiusuni, Ilulissani ilinniarnertuunngorniarfeqalernissaanut suliniaqataasoq Lena Ravn Davidsen oqarpoq.
Ilinniartitaanermut naalakkersuisoq Palle Christiansen ataatsimiinnermi peqataasoq siunertamut tapersersuivoq, suliniuteqartullu piviusunngortitsinissaannut kaammattuuteqarluni.
- Ilinniarnertuunngorniarfiliortoqarnissaanut suliniarnertik ingerlatiinnassagaat oqariartorfigaakka. Ilinniartitaanermut iliuusissaq inatsisartuni upernaaru saqqummiunneqarpat pinngitsooratik oqalliseqataaffigalugu qisuariarfigissagaat kaammattorpakka, politikkikkullu suliaqartut isummertinniassavaat Ilulissani ilinniarnertuunngorniarfeqalernissaq piviusunngortinneqassasoq, Ilinniartitaanermut Naalakkersuisoq Palle Christiansen oqarpoq.
Ilulissani ilinniarnertuunngorniarfik klassinik marlunnik aallartitsiffiusartumik sanaasoqassappat, tamanna 45-50 millioni koruunit missaanni akeqassaaq.
- Ilinniarfissanik sanaartornissamut aningaasaliissutissanik taarsigassarsinissap politikkikkut akuersaarneqarnissaa pingaaruteqarpoq. Ilinniartitaanermilu anguniakkat aningaasanut inatsisissaq suliarineqalerpat eqqaamaneqarnissaat pingaaruteqarpoq, tassami ilinniarfissanik sanaartornissamut aningaasat immikkoorteqqaarneqartariaqarput, Palle Christiansen oqarpoq.
Ilulissanilu ilinniarnertuunngorniarfiliortoqarnissaanut suliniuteqartut maanna paasisitsiniaanissaq sulissutigissavaat.
- Taava massakkut innuttaasunut kaammattuilluta aallartittariaqassuugut, ilinniartitaaneq siumut ingerlassappat, Kalaallit Nunaanni ilinniartitaaneq qaffassappallu uagut suliniuterput tassunga attuumalluaqqissaartoq, Lena Ravn Davidsen oqarpoq.
