Ilulissani 'Football Festival' aallartippoq

Europami arsaattartut kattuffiat FIFA "Football Festival 2011"-mik taallugu Ilulissani ulluni makkunani ingerlatsileruttorpoq, unnugulu meeqqat arfinilinniit aqqaneq marlunut ukiullit peqataanissaminnut tikilluaqqusaapput.
juulip 28-at 2011 13:53

Ilulissani FIFA Football Festivali Kalaallit Nunaanni FIFA Football Festivalini pingasuni siulliuvoq.

Arsaattartut kattuffissuat marlunnik Kalaallit Nunaaliartitsivoq.

FIFA-mi ilitsersuisoq Jean-Marie Conz FIFA-milu aaqqissuisoq Jorge Diaz Garcia sungiusaasut 13-it, meeqqanik sungiusaanermi suut eqqumaffigisassat pingaarnerunersut pillugit pikkorissaanermut peqataaniarlutik nalunaarsimasut, pingasunngormat naapippaat.

Ilulissani arsaattarfik sungiusaasunut 13-inut pikkorissarfittut atorneqarsimavoq, meeqqanit amerlasuunit ikiorneqarlutik. Meeqqat arfinilinniit aqqaneq marlunnut ukiulinnut sungiusaanermi pikkorissarnermi meerarpassuit misiliutitut atorneqarsimapput.

Tallimanngorpallu Football Festival 2011-ip qaffasinnerpaaffini tikissavaa, meeqqat arfinilinniit aqqaneq marlunnut ukiullit Ilulissaniittut tamarmik arsaattarfimmut arfineq marluk qeqqaniit qulingiluat tungaanut peqataajartorsinnaammata.

Peqataanissamullu patsisissat arlaqarput. Peqataasut tamarmik FIFA-miit arsamik tujuuluaqqamillu tunisissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq