Ilulissani akunnittarfiit siullersaat tunineqartoq

Takornarianut akunnittarfik siulleq Ilulissaniittoq, Hotel Hvide Falk ukiortaaq aallarnerfigalugu Albatros Greenlandimit suliffeqarfissuarmut Albatros Travelimut ilaasumit pisiarineqarnermigut nutaanik piginnittoqalerpoq.
 
Pisisup upernaap tungaanut ikaarsaariaqartoqalerpat aqutsineq, ingerlatsinerlu piginnittuusimasunit Tuuta Lynge Knudsenimit aamma Jakob Knudsenimit tigujartuaassavai.
 
- Hotel Hvide Falk akunnittarfiuvoq kusanartoq, oqaluttuassarpassualik kiisalu kusanarluinnartumik inissisimasoq, Albatros Greenlandimi pisortaasoq Søren Rasmussen oqarpoq.
 
Akunnittarfik 1970-imi sananeqartoq 38-nik ineqarpoq qulingiluanillu inissiaqarluni, taakkua amerlanerpaartaat Qeqertarsuup Tunuanut kusanavissumik isikkiveqarput.

AAMMA ATUARUK Ilulissani akunnittarfiliortoqalerunartoq

Ilulissani takornariaqarnerpaaffiup nalaani akunnittarfinni inissat ukiuni arlalinni killeqartarsimapput. Takornariarpassuimmi nunani assigiinngitsuneersut avannaanukarusuttarmata.
 
Tamannali allanngortinneqartussanngorunarpoq, Ilulissanimi akunnittarfimmik nutaamik quleriinnik tallimanik initaqartumik sanaartortoqassagunarpoq.

Kommunimmi pilersaarutaanut tapiliussaq, illoqarfiup qiterpasissuani akunnittarfiliornissamik periarfissiisoq kommunalbestyrelsip akuersissutigeqqammerpaa.
 
Ilulissani Kaaleeraq Poulsenip Aqqutaata eqqaani quleriinnik tallimanik initalimmik akunnittarfiliornissaq pilersaarutigineqarpoq.