Iluliarmiut sukisaarsartarfittaassapput

Innuttaasut sapaatip akunnerat aallartilaarnerani ataatsimiitinneqarneranni suleqatigiissitaliortoqarpoq.

- Ukiuunerani pinnguarfiusinnaasut qaammariartulernerani piareersimassapput,  suliniummik aallarnisaasoq Palle Jerimiassen oqarpoq.

- Ilulissat eqqarsaatigalugu, timersorneq samminngikkaanni allamik sammisassaqartitsivimmik, ilaqutariinnut katersuuffiusinnaasumik soqannginnera aallaavigalugu taamatut pilersitsinissamut suliaq aallartippoq, Palle Jerimiassen, sammisassaqartitsivissamik pilersitsinissamut aallarnisaasoq, oqarpoq.

Innuttaasunik ataatsimiisitsinermi suleqatigiissitaq aqqaneq-marlunik inuttalik pilersinneqarpoq. Sammisassaqartitsivissaq Ilulissat timersortarfiata saavani pilersinneqarusuppoq, sumiiffinnilu allani aamma pilersinneqarusulluni. Sammisassaqartitsivik meeraaqqaniit utoqqarnut atorneqarsinnaasutut eqqarsaataavoq.

- Ukiuunerani pinnguarfiusinnaasut siulliit naatsorsuutigivagut qaammariartulernerani atulersinnaassallugit. Una sammisarput siulleq timersortarfiup eqqaa aasaru siullernik aallartitsiffigisinnaallugu naatsorsuutigaarput, Palle Jerimiassen oqarpoq. 

Qimussertartut peqatigiiffiat Qimussersaq siunnersuuteqarpoq kalaallit timersuutaat aamma sammineqarsinnaasut. Sammisassarineqarsinnaasullu suleqatigiissitamit misissuataarneqassapput. Pinnguartarfiit sammisassarineqarsinnaasullu allat katillugit 1,2 millionit koruunit missaannik naleqarsinnaasut naatsorsuutigineqarpoq. Neriuutigineqarporlu suliffeqarfiit sammisassaqartitsiviliornermut atortutigut sulisutigullu tapersiiumaartut, aammali aningaasannanniartoqassaaq.

- Tassa suliffeqarfiit maani Ilulissani saaffigineqassapput, aamma aningaasaateqarfiit saaffigineqassapput, taavalu aamma konto pilersinneqarpat innuttaasut tapiisinnaassapput, Palle Jeremiassen oqarpoq.