Iluliarmiut oqaluttuarisaanermut ilannguttumik volleyballimi pissartanngorput
I-69 Ilulissaneersoq siullerpaamik volleyballimi Nunatsinni pissartanngorpoq peqatigiiffiup arnartai GM-mik aaqqissuisunut AVI-mut Maniitsumeersumut ajugaammata.
Timersoqatigiiffik IVK ukiorpassuarni Ilulissat sinnerlugit volleyballimi pissartanngorniuteqataasartoq uninnikuuvoq. Taamaattumik I-69 volleyballimi immikkoortoqarfittaarpoq taamatullu ingerlatsinermi pitsaaqisumik aallartilluni.
Finalemi I-69 AVI-mut sættini 3-1-mik ajugaavoq qineqqusaartoqartussaaneralu pissutigalugu tamanna ullaap tungaa qulinut aallartippoq unammineq KNR-TV-mi isiginnaarneqarsinnaaniassammat.
Corona GM-mi malunnaateqarpoq tassami isiginnaartoqarani unammisoqarpoq aammalu peqatigiiffiit unammisut qujaffigeqatigiinneranni assamminneq atorneqarani.
Unammit bronzeusut arnani KT-VI-mit Kangaamiuneersumit pissarsiarineqarput taakkulu nunaqqatigiit ukiorpassuarni volleyballimi angusarissaartarpoq. Bronzennanniunnermi KT-VI PVN-mut Nuummeersumut ajugaavoq.
Nunaqarfillu 300-ut sinnilaaginnarlugit inulik angutini aamma ujamminik pissarsivoq KT-TV sølvinnammat GSS Nuummeersoq 2019-mi Nuummi pissartanngortoq pissartanngoqqimmat.
Angutini unammit bronzeusut I-69-mut Ilulissaneersumut atitinneqarput taakku AVI Maniitsumeersoq bronzennanniunnermi ajugaaffigimmassuk.
Toqqaanerit
Piukkunnaateqarluartoq Inaluk Zethsen 17-nik ukiulik AVI-meersut arnani arsallammattut toqqagaavoq angutini Ujuaansinnguaq Kreutzmann Kangaamiuneersoq arsallammattut toqqagaasoq.
Iliisali finalemi amigaatigingaatsiarpaat kiasimmigut ajoquseqqanini pissutigalugu sættimi siullermi anisariaqalerami.
Aappaagu volleyballimi GM Sisimiuni pissaaq AVS angutini normu 5-nngortoq aaqqissuisoralugu. CIF-70 arnani normu 5-nngorpoq. Iligiillu taakku kajumissaammik tunineqarput arsartui tamarmik 20-it ataallugit ukioqartut unammersuarnerit ingerlaneranni siuariaateqarluarmata.