Iluliarmiut GU-qalernissartik kissaatigaat
HF, kingorna GU-nngortoq, inissinneqartussanngorpat Ilulissat taamani Aasiannut ajorsarput ilinniarfik taanna 1983-imi Aasianni aallartimmat.
Maanna angajoqqaat arlallit isumaqalerput Ilulissat illoqarfiat ima angitigilersimasoq namminerisaminik GU-qalersinnaalluni.
- Ilulissani inuusuttut ineriartoqqinnissaannut aqqutissiuusseqataanissaq pisariaqartipparput, taama nalunaarput suliniummik allartissaasut Lena Ravn Davidsen, Ane Solveig Hansen aamma Leif L. Mathiesen.
Perorsaanermik Ilinniarfimmi Ilulissaniittumi pisortaq, Nuka Kleemann, isumaqarpoq Ilulissani ilinniarnertuunngorniarfeqalissangaluarpat, ilinniartitsinermi Perorsaanermik Ilinniarfik aamma ilinniarnertuunngorniarfik suleqatigiissinnaasut:
- Assigiinngitsunik suleqatigisinnaavagut, soorlu assersuutigalugu GU fagini assigiinngitsuni ingerlassinnaasatsinni taakkua suleqatigiiffigisinnaavagut, taamatut aallartittoqassagaluarpat, Nuka Kleemann oqarpoq.
Nuka Kleemannip isertuutinngilaa namminneq aamma soqutigigitsik Ilulissat suli amerlanerusunik ilinniartoqalernissaa:
- Uagutsinnut iluaqutaanngittoornaviannginnami ilinniartut amerlasuut illoqarfimmiilerpata, ilinniartut ulluinnarni inuunerannut, uagullu aamma ingerlanitsinnut attuumassuteqanngittoornavianngimmata, Nuka Kleemann oqarpoq.
Innuttaasut ataatsimiigiaqquneqarput pingasunngorneq martsip pingajuat tassani oqaluuserineqassallutik Ilulissat ilinniarnertuunngorniarfeqalernissamut neqeroorutigisinnaasai. Ataatsimiinnermi peqataasussatut aggersarneqartut ilagaat perorsaanermik ilinniarfik illoqarfimmi tassani inissisimanini pillugu misilittakkamik saqqummiussinissamut periarfissinneqartoq.
Illoqarfimmi tassani 4.500-nik inulimmi GU-taarniarnerup qanoq ingerlaqqinnissaa isumaqatigiissutigineqassasoq ataatsimiisitsiniarnermi siunnerfigineqarpoq.
