Iluliarmiut atuarfittaassapput
Ineqarnermut, Attaveqarnermut Angallannermullu naalakkersuisoq Jens B. Frederiksen, Qaasuitsullu Kommuniata borgmesteria Jess Svane, tusagassiutinut nalunaarummi taama allapput.
Atuarfik Mathias Storchip iluarsaanneqarnissaata ilimagisamiit 11 millionit koruuninik akisunerulernissaa paasinarsisorlu, taama aalajangertoqarpoq.
Suleqatigiissitamik, kommunimit aamma Namminersorlutik Oqartussanit ilaasortaaffeqartumik pilersitsisoqarnissaa taamaammat isumaqatigiissutigineqarpoq.
Suleqatigiissitaq sanatitsisup meeqqat atuarfiat nutaarluinnaq pillugu isummernnissaanut tunngaviusumik tunniussissaaq.
- Aningaasanut Inatsisissap novembarimi pingajussaaneerneqannginnerani Inatsisartut isummernissamut tunngavissiamut aalajangiinissaat anguniarneqarpoq. Inatsisartut isummernissamut tunngavissiamut isumaqataappata, meeqqat atuarfiannik nutaamik sanaartorneq 2013-imi aallartinneqarsinnaaleriissaaq, Jens B. Frederiksen oqarpoq.
Atuarfik Mathias Storchimi pissutsit maannakkut atuuttut tamanut naammaginanngitsut, borgmesteri Jess Svane oqarpoq.
- Soorunami aamma neriuutigaara, meeqqat atuarfiata sananeqarnera suliffissaqartitsinermut siuartitsiumaartoq, aammalu najukkatsinni sanasut atuagaataat suliakkiiffissat ulikkaarluarumaartut, Jess Svane oqarpoq.