Iluliarmiu Juulunnguaq Vetterlain nunatsinni nukittunerpaanngortoq
Nunatsinni nukittunerpaasimasoq Kim Ujarak Lorentzen 2016-imiilli nukittunerpaasarsimasoq, arfininngormat unamminermi ujallumigut ajoquserpoq unammisinnaajunnaarluni.
Maanna nunatsinni nukittunerpaanngorpoq, 29-nik ukiulik, Iluliarmiu, Juulunnguaq Vetterlain.
Taanna sapaammi KNR timersornermi apersorneqarluni ilaatigut ima oqarpoq:
Unamminermi ajugaasut:
1. Juulunnguaq Vetterlain, Ilulissat
2. Angula Ottosen, Aasiaat
3. Heine Kaas, Aalborg
4. Kristiaannguaq Lange, Ilulisat
5. Peter Qujaukitsoq Peary, Qaanaaq
- Nuanneq nassuiaruminaappoq. Iluliarmiut tapersersuinerat assut ingasappoq. Tapersersorneqarneq nukissamik tunisisarpoq iminullu upperinerulernartarluni, Juulunnguaq Vetterlain, sapaammi KNR-imut oqarpoq.
AAMMA ATUARUK Kim Ujarak Sverigemi nukittuneqqusaattuni ajugaasoq
Timersuut nukittuneqqusaanneq Greenland Strongestimik taaguutilik, sinerissamit assigiinngitsunit peqataaffigineqartartoq ukioq manna Ilulissani aaqqissuunneqarlunilu ingerlanneqarpoq.
Unamminermi tassani Kim Ujarak Lorentzenip 430 kilo kiveriarlugu ujallumigut nukkilisitsilluni ajutoorpoq.
Taanna 105 kilo ataallugu oqimaassuseqartuni unammeqataavoq.
Aajunu Ilulissani nukittuneqqusaattut. Assi: Heidi Jensen.
Unammisut katillutik aqqaniliupput, taakku Qaanaamiit, Uummannamiit, Ilulissaniit, Aasianniit, Nuummiit Aalborgimiillu peqataapput.
Sapaatini akunnerni arfiniliinnarni sungiusarsimasoq
Taakkulu tamarmik ajugaaffigalugit misigisaq, Juulunnguaq Vetterlainimit ima oqaasertalerneqarpoq.
- Nuannerpoq pissanganarlunilu, ingammik naggataa taanna pikkunarpoq. Immitsinnulluunnit qiviarpiarsinnaanata taakani tunuani pissangarpasippugut.
Juulunnguaq Vetterlain nunatsinni nukittuneqqusaannermi pingajusssaaneerluni ukioq manna unammeqataavoq.
Qanoq sungiusartigigavit ukioq manna taamatut angusaqarpit?
105 kiloni ajugaasut:
1. Nikolaj Joensen, Nuuk
2. Taatsiaq, Gabrielsen, Ilulissat
3. Bjørk Kristensen, Nuuk
4. Nukappi Vetterlain, Nuuk
5. Pavia Nielsen, Uummannaq
6. Michael Thorsen, Nuuk
- Ukioq manna ilaanianngikkaluarama, ilaaleriataarama sapaatit akunneri arfiniliinnaat sungiusarnikuullunga peqataavunga.
AAMMA ATUARUK Rekordi nutaaq: Kim Ujarak Lorentzen 425 kilomik dødløftimi kivitsivoq
Ilulissani nukittuneqqusaattoqarnerani unammeriaatsit Iluliarmiunut aamma tulluussarneqarput, tassa qimussimik taallugu unammisitsisoqarmat.
“ Poorsuaq” ataaseq 120 kilomik oqimaassusillit marluk qamutinut iliartoriarlugit, qamutit uniarlugit piffissap aalajangersimasup iluanni titarnermut apuunniuttussaavaat.
Taannali unammissut Juulunnguaq Vetterlainimut sakkortusimavoq.
- Sakkortoq sakkortunerpaatut taasinnaavara, ingammik sekundit apeqqutaallutik anguniagaqarneq ilungersunarpoq, apissikkamami natermut innaannarpunga.
