Kim Ujarak Sverigemi nukittuneqqusaattuni ajugaasoq
Ullumi pingasunngornermi nalunaaqutaq 14:49 naqqiut: Kim Ujarak Sverigemi nukittunerpaanngortoq siusinnerusukkut allappugut, tamannali ilumuunngilaq naqillutigulu.
Nunatsinni angutini nukittunerpaaq nukittuneqqusaattuni Sveriges Råaestemi arfininngormat ajugaavoq.
29-nik ukiullip, Kim Ujarak Lorentzenip, unamminermi ajugaanini tulluusimaarutigaa.
- Stærkmanderpassuit anguniagaqarlutik tassunga unammiartarput. Nunarsuarmut appakaakkusullutik qaffasissumik unammisartunut. Taamaammat isumaqartorujusuuvoq una uannut aamma ajugaallunga tassani unamminermi, Kim Ujarak KNR-imut oqarpoq.
Kim Ujarak Lorentzenip ersutamik kivitsineq dødløftimik taaneqartartoq, oqimaatsumik ersutaqarluni aqueqattaarneq squatimik taaneqartartoq, ujaqqanik oqimaatsorsuarmik kivitsineq kiisalu orpiup kippakuanik oqimaatsumik kivitsineq unammeqataaffigaa.
Taannalu kivitsinermi kisiartaalluni 180 kiilu kivippaa.
- Ukua unammisutit pingasut aamma ajugaavunga. Dødløftimi pingasuulluta ajugaavugut, "Log Press"-imi ajugaavunga, Squat-imi 2-ngoriarama, taavalu aamma kingulleq "Naturlig sten"-imik kivitsinermi ajugaallunga.
Assi: Katsi Kleist-Eriksen
Kim Ujarak Sveriges Råestemi ukiup aappassaa peqataavoq. Siornami aamma peqataavoq, tassanilu 5-inngorluni. Ukioq mannalu 22 pointinnalluni 2-nngortumit pointimik ataasiinnarmik pointeqarnerulluni ajugaavoq.
Andreas Ståglberg siorna ajugaasoq 2-nngorpoq.
-Taamaammat pissanganarnikuuvoq assut. Taavalu uanga ukioq kingullerminngaanniik siuariangaatsiarnera iluaqutigalugu upperilernikuugakku ajugaasinnaallunga uani unammisarnermi.
Sverigemi nunatsinniillu qarasaasiatigut Kim Ujarammut malinnaasorpassuupput, taannalu ilaquttaminit isiginnaartuniillu tapersersorneqarluarpoq.
- Taamatut takullugit tuppallernaqaaq - illersuerrattut, taavalu aamma perusillutik assigiinngitsunik perrannerat amma assorsuaq nuannerluni.
Kim Ujarak Arnold Strongman Classicimi septembarimi peqataassalluni pilersaaruteqarpoq, tassanilu ajugaasoq 300.000 koruuninnattussaavoq.