Iluliapiluunersuaq kaanngalerpoq

Silap pissusaata allanngoriartornera pillugu ilisimatuut amerikamiut sermimi quppaq annertusiartuinnartoq malinnaavigeqqissaarpaat, taakkulu maanna tassa oqarput, sermeq 160 kvadratkilomerterimit minnerunngitsoq kaanngaqqajaasoq.

- Qaqugorpiaq kaanngassanersoq soorunami oqarsinnaanngilanga, ullumikkulli, immaqaluunniit aasaru, pissappat tupaallaatigissanngilara, Ohiomi Naalagaaffimmi Ilisimatusarfimmeersoq, tassa Byrd Polarforskningscenterimeersoq, Jason Box, aviisip OurAmazingPlanetip nittartagaani issuarneqarpoq. Kingullertigulli oqartarpoq, maanna nillertikkiartulereermat, ullullu naaliartorlutik, sermip aasaqqippat aatsaat kaanngarnissaa ilimagigini.

Iluliarujussuaq Petermann Gletcherimiit siorna aasakkut kaanngarpoq, maannakkut kaanngartussamit marloriaammik angineq. Taanna suli aanngilaq, millerujussuareerlunili. Kilometerinik arfineq-marlunnik illuareerpoq, Labradorip sineriaanut maanna qanittumiilersimalluni. Iluliarsuaq taanna Nunatta oqaluttuarisaanerani annerpaajuvoq.

Unali maanna kaanngartussaq kinguneqapilunnerujussuusinnaavoq. Kaanngarunimi immaqa sukkasoorujussuarmik aakkiartussaaq, imaq qaffatserujussuarlugu. Siorna kaanngartoq taama kinguneqartitsinngilaq, amerikamiut ilisimatuut naliliipput.

- Uuma kaanngartussap sermip iigartartup illuariartornera immaqa sukkatsitissavaa, Jason Box oqarpoq.