Illut inoqanngittuarsinnarput

Illutsiarsuarsuit pillugit radioaviisi decembarimiit qulaajaalermalli, neriorsuutigineqartarpoq illut inuttalerneqarnissaat qanillilluinnartoq. Soorlu radioaviisip kingullermik sammimmagit Qaasuitsup Kommuniani sanaartornermut pisortaq, Jan Erik Andersen ima oqartoq:

- Amigaatigineqartutuaasoq tassaavoq, kuuffiup iluarsineqarnissaa taannalu saffiortut aqagu suliarissavaat. Illut attartortinneqarnissaat februaarip 15-iannut ullulerparput, Jan Erik Andersen oqarpoq.

Kisianni tassa illut suli inuttalerneqanngillat. Oqaatsormiullu illunut nutaarluinnarnut nuukkusuttut suli utaqqiuartariaqarput. Utaqqinerminnilu illut kiassarneqarnerannut akilersueqataapput. Illummi kiassarneqarneri nunaqarfimmut ingerlatsinermi aningaasaliissutinit akilerneqartarmata:

- Orsersorneri ingerlakkatsigit, sivitsorlunilu ukiut marluk sinneqalermata. Assut nuanninngilaq. Aningaasatsiarsuit arlaannut atorsinnaasaraluit, taamaalillutik tappikkununnga atortarput, Lars Fleischer, Oqaatsuni Nunaqarfinnut Aqutsisunut ilaasortaq oqarpoq.

Illut napparneqarnerminnit kiassarneqarnerinut qanoq annertutigisumik aningaasartuutaasimaneri Lars Fleischerip kisitsisaatiginngilai.

Taamattorli naatsorsuutigaa illut nutaat assigalugit, illu ataaseq ullormut 7 literimiit 10 literimut solaritortassasoq.

Ullumikkut solarip literimut akia 4,47 koruunit naatsorsuutigissagaanni, illu ataaseq ukioq kaajallallugu ullormut 10 literimik orserneqartarsimappat, nunaqarfimmi ingerlatsinermut aningaasaliissutinit 16.315 koruunit illup ataatsip kiassarneranut matussutigineqartarsimassapput.

INI A/S-imi nunap immikkoortuani pisortaq, Allan Werge radioavisimut ilisimatitsivoq, illut Qaasuitsup Kommunianit atorneqarsinnaanerannut suli akuersissutigineqarsimanngitsut. Aatsaallu INI-miit attortinneqalersinnaasut Qaasuitsup Kommuniata atorneqarsinnaaneranut akuersissummik tunniussippat.

Qaasuitsup Kommunianit Oqaatsuni panbonik illuliat suli atorneqalinngitsut pillugit oqaaseqartitsiniaraluaratta iluatsinngilarput.