Illussat sanaartorneqassapput
Qaasuitsup kommunalbestyrelsiani ilaasortap Demokraatineersup Ane Lone Baggerip Ilulissani illussanik sanaartugassat marluk, 24-inik inissiallit, Namminersorlutik Oqartussanit qaqugu aallartisinneqassanersut apeqqutigereeraalu neriorsuisoqarpoq.
Aningaasiliineq, pilersaarusiorneq suliariumannittussarsiuinerlu ajornartorsiorfiusimasut immikkoortortami pisortap, Olafur Nielsenip, ullumi oqaatigaa.
Namminersorlutik Oqartussat inissiaatileqatigiiffiata Illuut A/S-ip Sisimiuni inissialiornerit pingasut, Ilulissani marluk Qaqortumilu ataatsip aningaasalersornerata pingajoraterutaa isumagisussaagaluarpaat, aningaasalersorneqarnerisalu pingajorarterutaat sumiiffinni kommunet pingajorarterutaallu kingulleq illuliornermi aningaasanik attartortitsisartunit aningaasalersorneqartussaavoq.
Aningaasalli pillugit piffissaq kingulleq atorlugu kommunet ilaajunnaarput. Tamatuma kingorna isumaqatigiissutigineqarpoq Namminersorlutik Oqartussanit aningaasalersuinerup pingajorarterutai marluk isumagissagaat.
Isumaqatigeereernerulli kingorna allamik ajornartorsiuteqalersimavoq. Sisimiuni illussat pingasut pilersaarutaareersut pilersaarusiorneqarput, pilersaaruterli ajornakusoortumik sanaartugassanngorlugit aaqqitanik ilaqarsimavoq taamaalillunilu sanasut akii akitsorsimallutik, kvadratmeterimut 19.000-it 24.000-illu koruunit akornanni akeqalerlutik. Taamaalilluni inissiani nutaani ineqartussanut ineqarnermut akiliut qaffasippallaassaaq.
Taamaammat suliariumannittussarsiuinermi neqeroorutit tamarmik kasiilerneqarput. Taamaattumillu maanna aallaqqaataaniit nutaanik pilersaarusiortoqarpoq, ataatsimoorullugit suliassanngortinneqartussanik. Taamaalilluni kvadratmeterimut akit akuerineqarsinnaasut anguneqarniassammata, soorlu Nuummi nutaanik sanaartornerni, kvadratmeterimut aki - Olafur Nielsenip oqarnera naapertorlugu - kvadratmeterimut 14.000 koruunimiitsinneqartoq. Sisimiuni suliariumannittussarsiuinermit akikinnerujussuarmik.
Sanaartornerilli neriorsuutigineqarsimasut piviusunngussapput. Sanaartornermut ukiaanerani suliariumannittussarsiuunneqarsinnaassasoq naatsorsuutigineqarpoq, sanaartornermi suliffeqarfiit ingerlatitsiveqatigiillu soqutiginnittut illunut ataasiakkaanut tamanulluunniit neqeroorusiorsinnaassapput.
Suliariumannittussarsiuinerlu qaangiuppat sanaartorneq sukkanerpaamik aallartinneqassasoq, Namminersorlutik Oqartussat ineqarnermit immikkoortortaqarfianit oqaatigineqarpoq.
