Illussanik titartakkat alutornaqisut Katuami saqqummersilerpaat
Inuiaqatigiit kalaallit ineriartortinneqarneranni Sanaartugassanik titartaasartut qanoq peqataasinnaanerat saqqummersitsinermi takusassiarineqarpoq. Danmarkimi aamma Nunatsinni illussanik titartaasartut nalinginnaasumik akuerisaanerusut matumani peqataapput.
Pingaarnertut nakkutilliisoq Minik Rosing oqarpoq:
- Saqqummersitsinermut atatillugu apeqqutit pilersut tamanut atuupput, aamma Venedigimut peqataasunut nunanit tamalaaneersunut kalaallimullu Katuamut saqqummersitsinermik takuniaasumuttaaq attuumassuteqarlutik. Apeqqutit ilaat taamaallaat Kalaallit Nunaanni akineqarsinnaapput, taamaattorli Kalaallit Nunaata avataani sunniuteqartussaallutik. Taamaattumik Possible Greenlandip Kalaallit Nunaanni takutinneqarsinnaalernera tupinnaannartumik nuannerpoq, taamaalilluni siunissami suup tungaanut siunnerfeqarnissamik kalaallit akornanni oqallinnerup piukkunnaatilimmik eqeersarneqarnissaanut neriuuteqarsinnaalissagunaratta, Minik Rosing oqarpoq.
Dansk Arkitektur Centerimi pisortaanerup, kommissærillu, Kent Martinussenip, oqaatigaa, Possible Greenland aqqutigalugu suliniutip Kalaallit Nunaanni ineriartornermi avatangiisitigut killissarititaasut assit atorlugit inunnit paasineqarsinnaasut pilersinneqarnissaat siunertarineqartoq.
- Suliami oqaatsit assinngortinneqarput, ilaqutariillu inaat nutaat qanoq aaqqissuunneqarsinnaanersut, imaluunniit mittarfiit talittarfiillu tunisassiornermut atatillugu pilersinneqartut, ataatsimoortillugit attaveqaqatigiinnikkut nunani tamalaani ittutut, aamma illoqarfiit Kalaallit Nunaanniittut takornariartarfiusinnaanersut, tamatumunngalu ilutigitillugu kalaallinut najugaqarfigissallugit najussallugillu soqutiginarnerulernissaat, saqummersitsinermi ersersinniarneqarput, Kent Martinussen oqarpoq.
