Illunik attartortitsinikkut iluanaarniapiluttarneq unissaaq

Peqqussutip allanngortinneqarnissaanik siunnersuuteqartuuvoq Inatsisartuni ilaasortaq Olga Poulsen Berthelsen, IA-meersoq.

Inatsisartuni ippassaq oqaluuserineqarnerani illuliortiternermut aningaasalersuinermi inatsimmi periarfissarititaasoq 20/20/60 malillugu illuutillip attartortitsinermini akigititai taamaalillutik qummut killerneqarsinnaanngortut oqaatigineqarpoq.

Allanngortinneqarnissaa inatsisartuni amerlanerussuteqartut akueraat.

Attartortitsisup akigitinneqartumut sanaartornermut aningaasartuutigisimasani qaangerlugit akiliisitsippat, taava ingerlatsinermut aningaasartuutit uppernarsarneqarsinnaasut tunngavigalugit aamma illup nammineq teknikkikkut nalingata qanoq innera akiliutip angissusilernissaanut siunissami aalajangiisuussaaq. Illuliornermi taarsigassarsisimasup taamaalilluni inatsisitigoortumik piginnaatinneqarsimasumut, suliffeqarfimmut pisortaqarfimmulluunniit inissanik amigaateqartumut illu attartortissinnaavaa, inissianik attartortitsinermi ullumikkut akigititaasut malillugit annikitsuinnarmik iluanaarutissartalerlugu.

Ajornartorsiutip qiterisimavaa attartornermut peqqussut taamaallaat attartortunut inuinnaasunut atuussimammat.

Maannali tassa suliffeqarfinnut pisortaqarfinnullu aamma iluaqutissanngortinneqartussanngorpoq.

Attartortitsisoq qanorsuaq siornatigut akimik qaffasitsitsisinnaasimavoq, allaat ilaasa iluanaarniutigipiluttaraat oqaatigineqarluni. Tamannalu pingaartumik inimik illumilluunniit suliffeqarfinnut pisortaqarfinnulluunniit attartortitsinermi takussaasimavoq.

Inatsisartut peqqussutip allanngortilaarneratigut akinik qaffasitserujussuarsinnaaneq januaarip aallaqqaataaniit atorunnaarsittussanngortippaat.

Inatsisartut oqaluuserinninnerminni Naalakkersuisunut inassutigaat siunnersuutip novembarip qulingani oqaluuserineqaqqinnginnerani allannguutissaq oqartussanut kattuffinnullu tusarniaassutigineqassasoq.