Illumut nipilersortarfissamut Islandimiut tunissuteqarput

Illup ikuallannera Islandimi annilaarutigineqaqaaq, taakkumi Tunumiunut qanittumik attaveqarluartuugamik. Taamaammat Islandimiut kalaallillu Islandimi peqatigiiffiat Kalak aningaasanik katersiniarluni aallartippoq, ilaatigut Reykjavikimi tapersersuiniarluni nipilersornermik tusarnaartitsinermik angisuumik, Islandip præsidentiata Òlafur Ragnar Grímssonip illersuisuuffigisaanik aaqqissuussisoqarluni. 

Nipilersornermik tusarnaartitsinermit isertitat saniatigut Islandimi naalakkersuisut 230.000 koruuninik tunissuteqarput.

Pilersaarutit naapertorlugit Islandimiut tunissuteqariartortut 30-usut Air Icelandip akeqanngitsumik Islandimit Kulusummut ullumi timmisartuuttussaagaluarpai.

Silali patsisigalugu pilersaarutit aqagumut kinguartinneqarput.

Islandimit tunissuteqariartortut nipilersuuterpassuit saniatigut aamma 400.000 koruuninik tunissuteqarniarput.

Hotel Kulusummi aqagu ualikkut Kommuneqarfik Sermersuup borgmesteria kommunalbestyrelsimilu ilaasortat ilaat tunissutinik tigusisussaapput.

- Islandimit tikeraartorpassuit naapinnissaannut qilanaarpunga. Islandimiut tapersersuillutik iliuuseqarnerat, qamuuna attortinnartuuvoq isumaliulersitsillunilu. Islandimiut Tunumiullu inuppalaartumik attaveqaqatigiinnerat nukittuumik ingerlanneqartoq tamatumuunakkut ersersinneqarpoq, Borgmester Asii Chemnitz Narup nuannnaaqisoq qujaniaqisorlu taama oqarpoq.