Illumi silataani nannuttoq

Henrik Isaksenip nulia ippassaq illuminniit anigami tuparujussuarpoq. Tassami illuata eqqannguaniipput nanoq piaraalu.

- Isumaqarpunga meterinik sisamaannarnik illutsinniit ungasitsigisut, Henrik Isaksen KNR.gl-mut oqarpoq.

Ingerlaannarli nannut issunneqanngillat. Aatsaat Namminersorlutik Oqartussaniit akuersisoqareermat Henrik Isaksenip qoorortuuni immeriarlugu illumiit anivoq

- Nannut qaneruttormata paniga qulinik ukiulik aperigaluarpoq nannut attoqqaarsinnaanerikka, Henrik Isaksen oqaluttuarpoq.

Nanorli inersimasoq piaqqisartoq ulorianarsinnaasorujussuuvoq taamaattumik nanoq piaraalu toqunneqarput tamatumalu kinguninngua nunaqqataasut ussangarput.

Nannut niaqui, amii aqajaruilu Nuummi misissugassanngorlugit nassiunneqassapput. Ullumilu ullup qeqqanut nunaqqataasut nanortoriartoqqusaapput.

- Tassa 60-liisussanngorpunga piniartuujuaannarsimallungalu. Taamaattoq taamatut misigisaqarsimanngisaannarpunga, Henrik Isaksen oqarpoq.

Ippassaq tassa nannoqqaataa. Nannunik siornatigut takusarsimagaluarpoq tamannali pisarsimavoq pisassat tamakkerneqareersut.

- Piniagassaq taama imaannaanngitsigisoq qanimut takullugu misigisoq imaannaanngilaq, Henrik Isaksen oqarpoq.

Nannut unnuaanerani peqqumaasivimmut iserlutik puisinik nerisimapput.