Illuatungiliuttut: Tukassimaqaaq

Aningaasanut inatsisissaq aappaagumoortoq Inatsisartuni tallimanngormat unnuakkut akuersissutigineqartoq, Aningaasaqarnermut Naalakkersuisup tulluusimaarutigaa.

Illuatungiliuttut taama isumaqanngillat, aappaagumullu aningaasanut inatsisissaq akuerinagu. Aappaagumut aningaasanut inatsisissaq Inuit Ataqatigiit Demokraatillu qanoq isumaqarfigineraat paasiniarparput:

- Aningaasanut inatsisissap taama isikkoqartillugu akuersissutigineqarnera uggornartuutippara. Tassami immikkuualuttortai qimerluualaaraanni siunissaq ungasinnerusoq eqqarsaatigalugu ilaatigut aningaasaliisoqanngilaq, siunissarli qaninnerusoq taamaallaat eqqarsaatigineqarluni, Naaja Nathanielsen, Inuit Ataqatigiit sinnerlugit Inatsisartut Aningaasaqarnermut Akileraartartarnermullu ataatsimiititaliaanni ilaasortaq oqarpoq.

Aalisarnerup iluani akitsuutinik imaaliallaannarluni eqqussisoqarnera, taassuma apeqquserpaa, soorlu aamma Namminersorlutik Oqartussat Grønlandsbankenimi piginneqataassutaasa ilaannik tunisaqarnikkut aningaasanut inatsisissami aningaasartuutit ilaasa matussuserniarneqarnerat apeqquseraa.

Demokraatittaaq aappaagumut aningaasanut inatsisissaq taama isikkoqartillugu iluarinngilaat, akuerseqataanatillu. Siulittaasuat Jens B. Frederiksen ilaatigut ima oqarpoq:

- Tukattorujussuarmik pinngorpoq, ingammik sapaatip-akunnerup kingulliup ingerlanera. Allannguutissatut siunnersuutit nutaat saqqummiunneqaqattaarput, ilai peerneqartarlutik, ilaallu uterteqqinneqartarlutik. Tamaalinikkut aningaasarpassuit millionilikkaat saqqummiunneqaqattaarput. Tamanna akuerisinnaanngilarput, Jens B. Frederiksen oqarpoq, aningaasanullu inatsisissaq politikkikkut tikkuussinnginnerarlugu:

- Putunik ilaartuipput, allatut nassuiarneqarsinnaanngilaq, kisianni politikkikkut siunissami qanoq ingerlassanerluta esarinngilaq, Demokraatit siulittaasuat Jens B. Frederiksen oqarpoq.

Aningaasanut inatsisissaq pillugu Naalakkersuisoqatigiit iliuuserisaat tukassimaqisoq, sungiussisimarpalunngitsumillu aqunneqarsimasoq, Naaja Nathanielsenip Jens B. Frederiksenituulli oqaatigaa:

- Aningaasanut inatsisissap akuerineqarnissaata tungaanut tukassimaqaaq, sungiussisimarpalunngitsumillu aqunneqarluni. Allannguutissatut siunnersuut kingulleq 60 millionit koruuninik nalilik ullup akuersiffiusussap ullaa tungaani saqqummiunneqarpoq. Aningaasat taama amerlatigisut eqqarsaatigalugit eqqarsarnarpoq, tassami aatsaat siullerpaamik immaqa taamaaliortoqarpoq, Inuit Ataqatigiit sinnerlugit Aningaasaqarnermut Akileraartarnermullu Ataatsimiititaliami ilaasortaq, Naaja Nathanielsen, oqarpoq.