Illuatungiliuttut oqallinnissaq sioqqullugu: Tatiginninnginnermik taasititsisoqassanersoq suli eqqartunngilarput

Nipisattassiissutinut suliaq Inatsisartuni sisamanngorpat oqallisigineqalerpat illuatungiliuttut tunuarsimaarnianngillat.
- Naalakkersuinikkut pissaanerullu agguarneqarneranut kalluaasumik Naalakkersuisut siulittaasuata siuttuulluni iliuuseqarnerata killilerneqarnissaa Inuit Ataqatigiinninnganniit angorusupparput, Múte Bourup Egede oqarpoq. Assi © : KNR / Malik Brøns
oktobarip 07-at 2020 05:12

Naalakkersuisut siulittaasuata Kim Kielsenip nipisattassiissutinik qaffaaqataaneranut suliaq pillugu oqallinneq sisamanngorpat nanginneqalerpoq.

Inatsisartuni partiit politikkikkut kinguneqartitsisoqassanersoq oqallisigissavaat.

AAMMA ATUARUK Nipisattassiissutinut suliaq: Illuatungiliuttut Kielsenimut uparuaaneq Inatsisartuni oqallisigisileraat

Nipisattassiissutit siorna pisarineqanngitsut ukioq manna pisassanut nuunneqarnissaat Naalakkersuisut upernaaq aalajangerpaat. Naalakkersuisut siulittaasuat Kim Kielsen suliamut attuumassuteqarpallaarsinnaanini naalakkersuisunut allanut paasissutissiissutiginagu aalajangeeqataanera isummanik aporaaffiuvoq.

Nipisattassiissutinut suliaq pillugu naatsumik:

 

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.


Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.


IA: Kim attuumassuteqarpallaarpa?

Inuit Ataqatigiit suliaq pillugu avammut nalunaaruteqaqqaarput.


Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

 

Kukkunersiuinermut ataatsimiititaliaq sakkortuumik uparuaasoq

Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.

 

Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.
 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

Illutungiliuttut suliaq Kim Kielsenimut politikikkut kinguneqartinneqassanersoq oqallisigitikkusuppaat.

Suliap ingerlarnga eqqartuussissuserisumit Inatsisartullu kukkunersiuinermut ataatsimiititaliaannit misissorneqareerpoq. Ataatsimiititaliap Kim Kielsen suliami attuumassuteqarpallaarsinnaanermut apeqqummut eqqumaffiginninngissimasutut sakkortuumik isornartorsiorpaa, tamatumalu saniatigut suliamut paasissutissat ataatsimiititaliamit qinnutigineqaraluartut Naalakkersuisunit tunniukkumaneqannginnerat aamma isornartinneqarluni.

Taamaattoqarnera politikkikkut ajornartorsiuterujussuusoq iliuuseqarfigineqartariaqartorlu Inuit Ataqatigiit siulittaasuata Múte B. Egedep oqaatigaa.

- Naalakkersuinikkut pissaanerullu agguarneqarneranut kalluaasumik Naalakkersuisut siulittaasuata siuttuulluni iliuuseqarnerata killilerneqarnissaa Inuit Ataqatigiinninnganniit angorusupparput.

- Tassami Inatsisartut Naalakkersuisunut sulisitsisuusut paasissutissanik perusutaminnik pisinnaatitaanerannut Naalakkersuisuninngaanniik killilersorneqarput. Tamannalu siullertut killilerneqartariaqarpoq ileqqunngortinneqartariaqanngimmat.

Suliamut tunngasunik paasissutissanik Naalakkersuisunit tunniussisimannginneq aamma Partii Naleqqamit sakkortuumik isornartorsiorneqarpoq.

- Taamatut matoqqatigisumik inuiaqatigiinnut ingerlatsineq akuerinngilarput. Allaat imminut iluaqutissinniarluni sulinertut taarusupparput. Taannalu Partiip Naleqqap akuersaarluinnanngeqqissaarpaa, Partii Naleqqap siulittaasua Hans Enoksen oqarpoq.

Kinguneqartitsinissamut piareersimasut

Nipisattassiissutinut suliaq kinguneqartariaqartoq Suleqatigiisitsisunit Tillie Martinussen isumaqarpoq.

- Nunani tamat oqartussaaqataaffiusuni naalakkersuisuni siulittaasuusoq taama kusanaatsuliortoqarsimatillugu nammineerluni tunuarniuteqartarpoq. Matumani naalakkersuisooqatigiit qanoq isummernissaat tusaajumaassavarput, Tillie Martinussen oqarpoq.

 

AAMMA ATUARUK Demokraatit nipisattassiissutinut suliaq pillugu: Isiginngitsuusaarnianngilagut

Oqallinneq Kim Kielsenimut tatiginnikkunnaarnermik taasititsinissamik kinguneqassanersoq partiit siuttuisa oqaatigiumanngilaat.

Inatsisartuni illuatungiliuttut katillugti 14-iupput, Naalakkersuisooqatigiit 17-iusut. Taamaammat illuatungiliuttut tatiginnikkunnaarnermik taasititsissagaluarpata Naalakkersuisooqatigiit amerlanerussuteqassapput.

Taamaaliortoqassappalli Atassut tunuarsimaarunnanngitsoq Aqqalu Jerimiassen oqarpoq.

- Kinguneqartitsinissaq pisariaqassappat Atassummiit tunuarsimaartussaanngilagut. Tamanna erseqqissumik taariiginnarsinnaavarput. Pisariaqartutut nalilerneqassappat tassunga akuussaqqaarpugut, Atassutip siulittaasua Aqqalu Jerimiassen oqarpoq.