Illuatungiliuttut: Naalakkersuisut akissuteqarnissaat amigaatigisimavarput
Illua tungiliuttut Inatsisartut upernaakkut ataatsimiinneranni ullormi ataatsimiiffiusumi kingullermi taama oqariartuuteqarput.
Oqallinnerlu ilaannni erloqinarsisarsimasoq, Partii Naleqqameersup Anthon Frederiksenip oqaatigaa.
- Inersuarmi oqallinneq erloqinalaarpoq, ilaannikkut Naalakkersuisunik oqaloqatigiinniniartarnerit isumaqatiginninniartarnerillu taqqamani Naalakkersuisuninngaanniit matoqqasorujussuummata, naalakkersuisooqatigiinni oqaluuserisani ilaanni allaat oqaaseqarumanngittarnerat erloqinartutut oqaatigineqarsinnaavoq.
Anthon Frederiksen urani pillugu oqallinneq innersuussutigalugu taama oqarpoq.
Partii Naqqalli Inatsisartunut 2014-imi ilaasortaateqaleramili ataatsimiinnermi aatsaat taama iluatsitsisimatigisoq, Anthon Frederiksen oqarpoq.
- Oqartariaqarpunga, Partii Naleqqap oqaluttuarisaanerani, siunnersuutigut taama amerlatigisut akuersissutigineqarmata nuannaarutigaarput,
Aamma atuaruk IA Nalerarlu: sanaartornermut atortussat nunatsinneersut suliffissaqartitsipput
IA: Unammilligassangaatsiaqarpoq
Aningaasaqarnikkut ingerlatsineq pillugu nalunaarutip saqqummiunneqarnera ataatsimiinnermi pingaarnerpaajusoq, Inuit Ataqatigiit politikkikkut oqaaseqartartuata Aqqaluaq B. Egedep qularinngilaa.
- Ukiamut aningaasanut inatsisissap nutaap suliarinissaanut toqqammaviusussanik isumaqatiginninnissuteqarpugut, taamaammat taakkunani suliat annertoorujussuit aammalu aaqqissuusseqqinnerit annertoorujussuit, Naalakkersuisut aningaasarpassuarnik sipaarniarnissamik siunnersuutaat, taavalu aamma aaqqissuusseqqinnissani tullerni inuiaqatigiit qanoq ittut pilersinneqarnissaanik isummersornerit annertoorujussuupput, Aqqaluaq B. Egede taama oqarpoq.
Aamma atuaruk Olsvig: Inuiaqatigiinni sanngiinnersagut akiliissanngillat
Naaja Nathanielsen ilaasortaajunnaarpoq
Inatsisartut upernakkut ataatsimiinnerat Naaja Nathanielsenimut, Inuit Ataqatigiinniit martsimi ilaasortaajunnaartumut kingulliugallarpoq.
Taannalu Kommunini Namminersorlunilu pisortat allaffissornerisa aaqqissugaanerannut atatillugu naliliinissamik siunnersuuteqarpoq, allaffissorneq nunanit allamiuninit aqunneqarnerarlugu oqartoqartarnera qatsukkamiuk.
- Asuli oqalupput. Namminersorluta oqartussaassuseqarpugut, taamaammat allaffeqarfigut namminneerluta aaqqissuussinnaavagut. Allat pisuutiinnarsinnaanngilagut, tamassumalu oqallisigineqarnissaa anguniaraluarparput. Pissutsit iluarinngikkutsigit uagut nammineq iliuuseqartussaavugut, Naaja Nathanielsen oqarpoq.
Aamma atuaruk Nathanielsen politikkeriujunnaalersoq
Kommunini Namminersorlunilu pisortat allaffissornerisa aaqqissugaanerannut atatillugu naliliinissamik siunnersuut Inatsisartut ukiakkut ataatsimiinneranni aappassaaneerlugu suliarineqassaaq.