Illoqqortoormiuni tunisassiorfiup ammaqqinneqarnissaanut piareersartoqarpoq

Tunisassiorfik kingullermik 2008-mi atorneqarpoq.

Tunisassiorfik ammarpat umimmaat, puisit qilalukkallu neqaat tunineqartalissapput taakkualu nunatta sinneranut tunineqartassallutik.

- Tunisassiorfimmi sulisut marluk pingasulluunniit aalajangersimasumik atorfeqassapput aamma piffissap ilaani piniartut sulisassallutik, Kommuneqarfik Sermersuumi ineriartortitsinermik siunnersorti Morten Nielsen taama oqarpoq.

- Tunisassiorneq aallartippat illoqarfimmi isertitat amerlanerunerannik kinguneqassaaq aamma suliffinnik ataavartunik peqalissaaq, piniartullu annerusumik suliaqalerlutik. Illoqarfimmut Illoqqortoormiunut inuttuallaanngitsumut tamanna pingaaruteqartorujussuussaaq, Morten Nielsen oqarpoq.

Tunisassiorfiup aallartinneqarnissaanut ajornartorsiutinik arlalinnik aqqusaagassaqarpoq.

Tunisassiorfik kimit imaluunniit kikkunnit ingerlanneqassanersoq isumaqatigiissutigineqanngilaq.

Morten Nielsenip oqarnera malillugu Illoqqortoormiuni piniartut aamma piumassuseqarluartut tunisassiorfiup ingerlanneqarnera isumagissavaat.

Kiffartuussinissamik isumaqatigiissutip isumaqatigiinniutigineqarnera suli naammassineqanngilaq.

Tunisassiorfiup iluarsartuunneqarnerata 2015-ip naalernerani naammassineqarnissaa pilersaarutaavoq, tunisassiornerlu aappagu 2016-imi marsimi aallaartissinnaalluni.

Illoqqortoormiuni tunisassiorfik 2007-mi unippoq, taamani Arctic Green Foodip tunisassiorfik tigummagu.  

Arctic Green Food taamani isornartorsiorneqangaatsiarpoq sinerissami tunisassiorfiit arlaqartut ammatinnneqanngimmata, naak suliffeqarfik kiffartuussinissamik isumaqatigiissut malillugu 11 millionit koruuninik  akilerneqaraluartoq.