Illoqarfiup qeqqani kalaaliminersiniarsinnaalerput

Kalaalimineerniarfik nutaaq Nuummi innuttaasunit utaqqisaasoq ammaanersiorneqarmat kaffeqarlunilu kaagerpassuaqarpoq, sulili kalaaliminernik pisiassaqanngilaq.

- Kalaaliaratoqaq suliarinneqqaartarfittut qaammatini pingasuni atoqqaassavarput,

Sanarfinermut avatangiisinullu Ataatsimiititami siulittaasoq Adolf Holm oqarpoq,

Kalaalimineerniarfitoqqami Kalaaliaqqami sulisut pingasut nutaami sulisorineqassapput.

Aamma Adolf Holmip kalaalimineerniarfimmi sulisorineqartartussat inuussutissalerinermik ilinniagaqarsimasuunissaat piumasaqaataasalissasoq oqaatigaa.

- Kalaalimineerniarfimmi nutaami toqqaannartumik igamut ikeriaannaanerusunik nioqquteqarnissaq siunertarineqarpoq, Adolf Holm oqarpoq.

Adolfip aamma oqaatigaa qaleruallit, raajat aamma aalisakkat suli uumatillugit niuernianit pisiarineqarsinnaalerumaartut. Igaassanik piareersariikkanik nioqquteqarnissaq takorluugaavoq.

- Naatsorsuutigaara nioqqutissat siulliit aqaguminngaanniit pisiarineqarsinnaalerumaartut, Adolf Holm oqarpoq.