Illoqarfiup immikkoortui aamma oqaluttuassaqarput
Qaasuitsup Kommuniata siunnersuutigaa Ilulissani arsaaffiup eqqaaniittut Kuunnguarsuup Qaava aamma Alanngukasiup Qaava allanngutsaaliukkanut ilanngunneqassasut.
Illoqarfiup ilaani taakkunani issittumi ilisimasassarsiortartut, politikkerit imaluunniit atuakkiortut tusaamasat najugaqarsimanngikkaluarput. Taamaattoq illoqarfiup ilai taakku Ilulissat illoqarfiata ineriartorneranut pingaaruteqarsimasutut isigineqarput.
- Illut Kuunnguarsuup Alanngukasiullu Qaaviniittut 1970-80-ikkut ingerlaneranni sanaajupput, piffissamilu tassani inuit anginerusunik illutaarusuttalerput, illoqarfiup pilersaarusiortua Hanne Holm Qaasuitsup Kommunianit KNR-mut taama oqarpoq.
- Illoqarfiup ilai aamma taakku ilisimaneqarput aalisartukkormiut sanaartornermilu sulisut najugaqarfiisut, oqaatsini ilavai.
Aalisarneq 1970-ikkut 80-kkullu ingerlanneranni inerisarneqarmat Ilulissani ineriartorneq sukkateseriasaarpoq innuttaasut anginerusunik illutaartalernerannik kinguneqartumik. Taamaammat Qaasuitsup Kommunia isumaqarpoq illoqarfiup ilai tamakku allanngutsaaliugassatut isigineqartariaqartut.
Imaanngilaq illoqarfiup ilai taakku sanaartorfigeqqusaajunnaassasut. Allanngutsaaliuinermulli aalajangersaanikkut illoqarfiup ilai taakku qanoq ineriartortinneqassanersut sinaakkuserneqassaaq. Innuttaasut arlallit kommunimut saaffiginnereersimapput illumik aneerasaartarfii allilerniarlugit.
- Illut uiunerinut tunngatillugu tunaartat aalajangersimasut malinneqartassapput, assersuutigalugu illut qaliaasa uinganeri illullu anginerpaaffissai aalajangersarneqassapput, Hanne Holm oqarpoq.
- Illoqarfiup ilai allanngutsaaliuganngortunik naleqarnerulissapput. Aamma piginnittunut iluaqutaasumik illut naleqarnerulissapput, Hanne Holm oqarpoq.
Illoqarfiup immikkoortuisa arlallit allanngutsaaliuganngortinniarnerat pillugu pilersaarutit saqqummiunneqassapput kulturikkut illorsuarmi Sermermiuni pingasunngorneq januarip 25-at innuttaasunik ataatsimiisitsinermi.
- Neriuppugut amerlasuut aggerumaartut apeqquteqarlutillu. Innuttaasut aamma periarfissaqarput oqaaseqaateqarnissamut, allannguutissani siunnersuuteqarnissamut imaluunnit pilersaarutinut akerliunissamut. Imaassinnaavoq innuttaasut isumassarsiaqartut pilersaarusiornermi eqqumaffigineqarsimanngitsunik, Hanne Holm oqarpoq.
